स्थानीय सामाजिक संगठन “बेटी है तो कल है” केर तत्वावधानमे रविदिन, मीरा रोड स्थित शिवार गार्डनमे, सफल रोजगार मेलाक आयोजन संपन्न भेल।
दीप प्रज्वलन एवं स्वागत – सत्कारके संग कार्यक्रमक शुभारंभ भेल। बेरोजगारी, जे देशक एकटा प्रमुख समस्याक रूपमे सोझा अछि, ताहि हेतु केंद्र सरकार एवं देशक तमाम प्रदेश सरकार अपना स्तरसँ प्रयास क’ रहल अछि। आब एहि सभक अतिरिक्त, सामाजिक संगठन सभ, सेहो एहि समस्याक निदान हेतु तत्पर देखल जा रहल अछि। :बेटी है तो कल है,’ एहि सामाजिक संस्था द्वारा, पहिल बेर एहि तरहक आयोजन कएल गेल छल, जाहिमे सहभागी तमाम युवक-युवतीक खुशी आ उत्साह देखिते बनैत छल। संस्थाक कर्ताधर्ता सतीश झा केर अथक प्रयाससँ एहि रोजगार मेलामे, तीस – पैंतीस कंपनी तत्काल भर्तीक लेल उपस्थित छल। रोजगार मेलामे सहभागी नियोक्तामे मुख्य रूपसँ एक्सिस बैंक, आईसीआईसीआई बैंक, कोटक महिंद्रा बैंक, पालिसी बाजार, संगहि आनो आन प्रतिष्ठित संस्थानक स्टॉल लगाओल गेल छल। एक सयसँ बेसी बेरोजगार युवक-युवतीकेँ तत्काल साक्षात्कारक उपरांत नियुक्ति पत्र देल गेल। कार्यक्रममे अप्पन संबोधक क्रममे, संस्थाक संस्थापक सतीश झा कहलनि कि, ई पहिल कार्क्रमक सफलतासँ अत्यधिक उत्साहित छी, आ एहि संस्थाक माध्यमे आगूओ एहि तरहक कार्यक्रम करैत रहब। कार्यक्रममे उपस्थित स्थानीय विधायक प्रताप सरनाईक एवं गीता जैन संगहि स्थानीय समाजसेवी मोजेस भाई द्वारा सेहो, एहि प्रयासक सराहना मुक्त कंठसँ कएल गेल। रोजगार मेलामे स्थानीय मैथिल समाजक उपस्थिति सेहो उत्साहवर्धक रहल। रोजगार मेलामे उपस्थित मैथिल बुद्धिजीवीमे अरुण चौधरी, धर्मेंद्र कुमार झा, आनंद मोहन झा, शंकर झा, दिपक झा, पंकज पाठक, रोहन झा, रामसुंदर झा, संजय राय, संगहि अनेको मैथिल सेवी संस्थाक पदाधिकारी सम्मिलित छलथि। एहि रोजगार मेलाक सफल आयोजन लेल संस्थाक पदाधिकारी बहुत पहिनहिसँ प्रयासरत छलथि। कंपनी आ बेरोजगार युवक-युवतीकेँ एक्कहि मंच पर उपस्थित करबाक ई प्रयास जे एहि संस्था द्वारा कएल गेल, ओ निश्चित रूपसँ बेरोजगार लेल एकटा स्वर्णिम अवसर सिद्ध भेल। मीरा-मुंबई उपनगरमे महिलाक सामाजिक एवं आर्थिक बदलावक वाहक बनि रहल ई संस्था, ‘बेटी है तो कल है’ आब रोजगार मेलाक आयोजन क’ युवा वर्गके लेल रोजगारक अवसर उपलब्ध करा कय हुनकर सभक भविष्य उज्ज्वल बनएबाक प्रयास क’ रहल अछि। कार्यक्रमक सफलतामे अप्पन भूमिकाक निर्वहन कएनिहार कार्यकर्तामे, सरिता मिश्रा, संगीता झा, मनोरमा झा, प्रतिभा मीरचंदानी, विपिन झा, विश्वरूपजी ललन झा, गोविन्द चौधरी, राजित झा एवं आनो आन स्वयंसेवी प्रमुख छलथि।
