राजस्थानमे सेहो नव चेहरा,भजन लाल शर्मा राजस्थानक नव मुख्यमंत्री

दीया कुमारी आ प्रेम चन्द बैरवा राजस्थानक नव उपमुख्यमंत्री
*
नई दिल्ली समदिया
*
राजस्थान सरकारक गठनक रास्ता साफ भेल। मध्य प्रदेश आ छत्तीसगढ़क बाद भाजपा आब राजस्थानमे मुख्यमंत्रीक नामपर सस्पेंस मंगलदिन समाप्त कऽ देलक। कैल्हि विधायक दलक बैसारमे भजन लाल शर्माकेँ राज्यक नव मुख्यमंत्री चुनल गेल। राजस्थान विधायक दलक बैसारमे शर्माक नामकेँ मंजूरी देल गेल। नवम्बरमे पाँच राज्यमे भेल तीनटा विधानसभा चुनावमे भारी जीत हासिल कयनिहार भाजपा मध्य प्रदेश आ छत्तीसगढ़मे जारी मुख्यमंत्रीक उम्मीदवारक रहस्यकेँ पहिनेसँ समाप्त कऽ चुकल अछि। राजस्थानक नव मुख्यमंत्री सम्पत्तिक मामिलामे सेहो करोड़पति छथि। हुनका लग एक करोड़ रूपया सँ बेसीक चल आ अचल संपत्ति अछि।
आलाकमान मुख्यमंत्रीक रूपमे नव चेहराक परिचय देलक। भाजपा मंगलदिन घोषणा कयलक जे दीया कुमारी आ प्रेम चन्द बैरवा राजस्थानक नव उपमुख्यमंत्री होयत। एक दिस दीया कुमारी जयपुरक राजपरिवारसँ छथि। ओतहि प्रेमचन्द बैरवा दलित समुदायक छथि। राजस्थानमे सरकारक तस्वीर मंगलदिन स्पष्ट भऽ गेल। भाजपा विधायक दलक बैसारक बाद भजन लाल शर्माकेँ राज्यक नव मुख्यमंत्री घोषित कयल गेल।
ई पहिल बेर अछि जखन राजस्थानमे दूटा उपमुख्यमंत्री होयत। दुनू काफी पढ़ल-लिखल छथि। प्रेमचन्द बैरवा जयपुरक दू-दूटा सीटसँ भाजपा विधायक छथि। ओ अनुसूचित जातिक छथि। एहि बेर ओ कांग्रेसक नेता बाबूलाल नागरकेँ खिलाफ पैघ जीत दर्ज कयलनि। बैरवा बहुत पढ़ल-लिखल छथि आ डॉक्टरेटक डिग्री प्राप्त कयने छथि।