बद्रीनाथ धामक कपाट खुजलाक सङ्ग उत्तराखण्डक चारु धाम केदारनाथ, यमुनोत्री, गंगोत्री आ बद्रीनाथक यात्रा प्रारम्भ भऽ गेल अछि। एहेनमे पहिल दिन केदारनाथमे रिकॉर्ड संख्यामे श्रद्धालु देखल गेल। एकटा अनुमानक अनुसार पहिल दिन ३२ हजारसँ बेसी श्रद्धालु बाबा केदारनाथक दर्शन कयलनि। केदारनाथसँ पहिने यमुनोत्री धाममे भक्तलोकनिक भारी भीड़ रहल।
सोशल मीडिया पर जारी एकटा वीडियोमे पहाड़ी मार्ग पर भक्तलोकनिक अपार भीड़ देखल जा रहल अछि। ई वीडियो सामने अयलाक बादे राज्य सरकारक तैयारीपर सवाल उठल। पुलिस प्रशासन कहलक जे ‘ओतय स्थिति सामान्य अछि आ आब भीड़ नहिं अछि’। ओना, दोसर दिस भीड़केँ देखैत रविदिन भोरमे उत्तरकाशी पुलिस एक्स पर पोस्ट करैत कहलक, “आइ क्षमताक अनुसार यात्राक लेल पर्याप्त श्रद्धालु श्री यमुनोत्री धाम पहुँचल छथि। आब बेसी भक्त भेजब जोखिम भरल अछि। आजुक यमुनोत्री यात्रा स्थगित करबाक लेल आब आइ यमुनोत्री यात्रा पर आबय जा रहल सभ श्रद्धालु सभसँ विनम्र अपील अछि।”
जँ सोशल मीडियाक वीडियो केर बात करब त एहि वीडियोमे स्पष्ट रूपसँ देखल जा रहल श्रद्धालुक सुरक्षाक बारेमे चिंता होयत आ लोक प्रशासन द्वारा कयल गेल व्यवस्था पर सवाल उठत। ओही वीडियोमे देखल जा रहल अछि जे लोक नहिं तऽ आगू बढ़ि पाबि रहल अछि आ ने पाछू जा पाबि रहल अछि। किछु लोक खतरनाक पहाड़ पर चढ़ैत सेहो देखल जाइत अछि आ खच्चर एवं डोलीवाला सेहो एहि भीड़मे फँसल अछि। एहि वीडियोसँ सोशल मीडिया पर आक्रोश पसरि गेल आ लोकसभ कहलनि जे सरकारकेँ एकरा नियंत्रित करबाक उपाय तकबाक चाही।
दोसर दिस, पुलिस कहलक जे “पूरा क्षेत्रमे स्थितिकेँ तत्काल नियंत्रित कयल गेल आ कोनो हताहतक सूचना नहिं भेटल’। आइ लगभग २:३० बजे शूट कयल गेल एकटा वीडियोमे तीर्थयात्रीसभकेँ पहाड़ी मार्गपर ट्रेकिंग करैत देखल गेल अछि किएक तँ एहि क्षेत्रमे हल्लुक बरखा भऽ रहल छल।”
