बिहारक पूर्व उपमुख्यमंत्री आ राष्ट्रीय जनता दलक नेता तेजस्वी यादव ट्वीट कयलनि जे नीतीश कुमार विधानसभा भंग करय चाहैत छथि। इहे कारण अछि जे बिहारमे नव सरकारक गठनक बादो मंत्रिमंडलक विस्तार नहिं भेल अछि। तेजस्वी कहलनि जे भाजपा-जेडीयूमे अविश्वासक अंतर बढ़ि गेल अछि।
तेजस्वी आइ-काल्हि जन विश्वास यात्रा कऽ रहल छथि। एहि दौरान ओ मुख्यमंत्री नीतीश कुमार पर जोर-शोर सँ निशाना साधि रहल छथि। ओ मुख्यमंत्री नीतीश कुमार पर आरोप लगओलनि जे “ओ बिना कोनो दृष्टिकोणक राज्यमे शासन कऽ रहल छथि आ बिना कोनो कारण गठबन्धनक सहयोगी बदलि रहल छथि।”
तेजस्वी यादव कहलनि “हमरासभ लग मात्र ‘माई’ अर्थात मुस्लिम यादव नहिं अछि बल्कि ‘बाप’ (बीएएपी) ‘बी’क अर्थ बहुजन, ‘ए’क अर्थ अगड़ा (उच्च जाति), ‘ए’क अर्थ अछि आधा जनसंख्या अर्थात महिला आ पी केर अर्थ पुअर यानि गरीब सेहो अछि। ओ अंग्रेजीमे ‘एमवाई’केँ ‘माई’ आबीएएपीकेँ ‘बाप’ कहैत कहलनि।
नीतीश कुमार द्वारा महागठबंधनसँ संबंध तोड़ि कए अपन पुरान सहयोगी भारतीय जनता पार्टी (भाजपा) केर नेतृत्व वाला राष्ट्रीय जनतांत्रिक गठबंधन (राजग) केर संग राज्यमे नव सरकार बनेलाक बाद सत्तासँ बेदखल तेजस्वी यादव मंगल दिन मुजफ्फरपुरसँ अपन ‘जन विश्वास यात्रा’ शुरू कयलथि आ फेर जनताक विश्वास जीतबाक लेल सीतामढ़ी आ शिवहर जिलामे दूटा रैली केर संबोधित कयलथि।
तेजस्वी यादव कहलनि “मुख्यमंत्री नीतीश कुमार मात्र आयुक दृष्टिसँ नहिं अपितु अपन मानसिकताक दृष्टिसँ सेहो बूढ़ भऽ गेल छथि। हम हुनकासँ १० लाख नौकरीक अपन वादा पर काज करबेलहुँ आ अभियानक आधा भागमे छलहुँ जखन ओ हमरासभकेँ धोखा देलनि।
३४ वर्षीय युवा नेता आरोप लगेलनि, ‘‘नीतीश कुमार बिना कोनो दृष्टिकोणक बिहार पर शासन कय रहल छथि आ ओ बिना कारणक पाला बदलैत रहैत छथि। एहिसँ राज्यक भला नहिं होयत। हम अहाँसभ लग राजनीतिक बीमा मांगय आयल छी। हमरा पांच सालक लेल सरकार बनबयमे मदद करु आ हम राज्यक कायापलट कय देब।’’
