मिथिला सांस्कृतिक समन्वय समितिक तत्वावधानमे रवि कऽ महाकवि कोकिल विद्यापति सह असम मिथिला विभुति स्मृति पर्व समारोहक आयोजन माछखोवा आईटीए सेंटरमे संपन्न भेल।
कार्यक्रमक मुख्य अतिथि असम साहित्य सभाक अध्यक्ष पद्मश्री सूर्यकांत हजारिका तथा सम्माननीय अतिथिक रूपमे उपस्थित स्टेट बैंक ऑफ इंडियाक महाप्रबंधक (पूर्वोत्तर क्षेत्र) अमरेश कुमार झा आ राज्यक पूर्व पुलिस महानिदेशक उमेश कुमार समारोहक उद्घाटन कएलनि।
समितिक तरफसँ एहि बेर भारत रत्न डॉ.भूपेन हजारिका सांस्कृतिक समन्वय सम्मान मिथिला रत्न कुंज बिहारी (दरभंगा) केँ प्रदान कएल गेल। ओतहिं राजकमल चौधरी मैथिली साहित्य सम्मान प्रो.डॉ. देव शंकर नवीन (नई दिल्ली) केँ आ भारत रत्न अटल बिहारी वाजपेयी मैथिली सेवक सम्मानसँ लक्ष्मण झा ‘सागर’ (कोलकाता) केँ सम्मानित कएल गेल।
एहि सुअवसर पर मुख्य अतिथि सूर्यकांत हजारिका श्रीमंत शंकरदेव विद्यापतिक समयक असम आ मिथिला समाजक स्थितिक विवेचना कएलनि। ओतहिं पूर्व पुलिस महानिदेशक उमेश कुमार सामाजिक-सांस्कृतिक समन्वयक क्षेत्रमे बेहतर कार्यक लेल समितिक सराहना कएलनि। समारोहक तहत सांस्कृतिक कार्यक्रमकेँ मिथिला रत्न कुंज बिहारी मिश्र आ हुनक टीम आगु बढाबैत एतय मौजूद श्रोता सभकेँ मिथिलाक सांस्कृतिक सुगंधसँ सराबोर कऽ देलक। ओतहिं दोसर स्थानीय कलाकार सभ असम शिल्पी समाजक आ लोक संस्कृति देव ध्वनि नृत्य पेश कऽ सबकेँ मंत्रमुग्ध कऽ देलक। मोना गुप्ता बगनिया लोक गीत गाबि कय असम आ मिथिलाक सांस्कृतिक समन्वयक अद्भुत भाव प्रस्तुत कयलनि। कार्यक्रमक शुभारंभमे युवा गायक ॠषभ भारद्वाज जय जय भैरवि भागवतीक आराधनाक आ सुश्री आर्या एवं सुश्री यशोधरा गणेश वंदना प्रस्तुत कएलक। सांस्कृतिक संध्याकेँ डॉली मैथिली तालुकदार असामिया आ मैथिलीमे गीत प्रस्तुत कयलनि।
एहिसँ पहिने संस्थाक अध्यक्ष सत्यनारायण साहू अतिथि सभक स्वागत करैत संस्थाक उद्देश्य आ कार्यकेँ सभकेँ सामने रखलनि। मंचस्थ सम्मानित अतिथि सभमे विवेकानंद झा पूर्व अध्यक्ष चेतना समिति पटना आ वर्तमान सचिव उमेश मिश्र चेतना समिति पटना अपन विचार रखलथि। मुख्य वक्ता प्रो देवशंकर नवीन मिथिला आ असमक बीच भाषाई संबंध पर प्रकाश डाललनि। लक्ष्मण झा सागर मातृभाषा मैथिलीकेँ जीवंत रखय पर जोर देलनि। समितिक मुख्य सलाहकार प्रेम कांत चौधरी असम-मिथिलाक सांस्कृतिक संबंध पर विचार व्यक्त कएलनि। मंच पर सांस्कृतिक महासभा
असमक अध्यक्ष एवं मिसांससक सलाहकार पवित्र कुमार शर्मा आ दुलाल बोरा सी एम डी, एन ई भारत 24 चैनलक संचालक उपस्थित छलथि। सभ सम्मानित अतिथकेँ असम आ मिथिलाक परंपरा अनुसार मिथिला पेंटिंग बाला दोपट्टा, (चादर) असमिया फूलाम गामोछा एवं सम्मान पत्र दऽ कऽ सम्मानित कएल गेल। सम्मानित करय वलामे सत्य नारायण साहु, राम सरोवर चौधरी, श्यामा कांत मिश्रा, राजेन्द्र झा, सरोज मिश्रा, विनय शील चौधरी, सुजीत कुमार मिश्रा, जगनिवास झा छलथि। प्रथम चरणक मंच संचालन दिलीप झा, द्वितीय चरण सम्मान सत्रक मंच संचालन जगनिवास झा कएलथि।
समारोहमे चेतना समितिक सचिव उमेश मिश्र प्रवासी जनसँ अपन भाषा, कला, संस्कृतिक संरक्षण, संवर्द्धनक लेल सभ प्रकारे आगू अएबाक आह्वान कयलनि आ एहि क्रममे आसाममे रहनिहार मैथिलक प्रशंसा कयलनि, संगहि प्रत्येक मैथिलसँ अपन परिवार आ दैनिक जीवनमे मैथिलीक व्यवहार करबाक अनुरोध कयलनि।
विवेकानंद झा कहलनि जे आसामक लोकक अपन भाषा संस्कृतिक प्रेम अनुकरणीय अछि आ प्रत्येक मैथिलकेँ ओहिसँ प्रेरणा लेबाक चाही।
