प्रो शीतलांबर झा, महासचिव मैथिल समाज रहिका मधुबनी प्रेस विज्ञप्ति जारी कय कहलनि कि समिति आइ दिनांक २१, २२ एवम् २३ केँ ५१म त्रिदवासीय मिथिला विभूति स्मृति पर्व समारोह आयोजित करत जे पिछला पांच दशकसँ आयोजित होइत आबि रहल अछि। एहि साल सेहो धूमधामसँ मनायल जायत, जकर तैयारी अंतिम चरणमे अछि।
आइ दिनक ५ बजे बाबा विद्यापति टावर स्थिति विद्यापति मूर्ति पर सर्वप्रथम दीप प्रज्ज्वलित, माल्यार्पण एवं पुष्पांजलि अर्पित अतिथि सभक द्वारा कयल जायत आ विद्यापति मैदानमे मुख्य समारोहक शुभारंभ, श्रद्धांजलि एवम गीत नाद एवम् नाटक आयोजित कयल जाएत।
दोसर दिन दिनांक २२ मार्चकेँ २ बजेसँ विचार गोष्ठी होयत, जकर विषय अछि “मैथिली भाषा……स्थिति आ स्थान।”
संध्या सात बजे मुख्य समारोहक शुभारंभ कयल जाएत, राष्ट्रीय, अंतरराष्ट्रीय ख्याति प्राप्त विद्वान , कवि , साहित्यकार सभक द्वारा विराट कवि सम्मेलन आयोजित कयल जाएत।
पूर्व घोषणा अनुसार संस्था द्वारा ” किरण पुरस्कार एवम यात्री पुरस्कार चयनित विद्वानकेँ देल जाएत संगहि रहिकेक बेटी प्रसिद्ध रंगकर्मी, अभिनेत्री, प्रेमलता मिश्र प्रेमकेँ संगीत नाटक अकादमी पुरस्कार प्राप्त करय लेल एवं साहित्य अकादमी पुरस्कार प्राप्त करय लेल बासुकी नाथ झाकेँ, संस्था विशेष रूपसँ अभिनंदन करय केर निर्णय लेलक अछि, संगहि संग स्मारिका विमोचन, कवि सम्मेलन उपरान्त प्रसिद्ध कलाकार सभक द्वारा सांस्कृतिक कार्यक्रम प्रस्तुत कयल जाएत।
अंतिम दिन २३ मार्चकेँ सांझमे संस्था द्वारा मैथिली भाषाक प्रसिद्ध गीतकार, गायक रवींद्र + महेंद्रक सम्मानमे पुरस्कार आ मैथिली सेनानी चुनचुन मिश्र सम्मान सभसँ चयनित व्यक्ति सभकेँ उक्त सम्मानसँ सम्मानित कयल जाएत एवम मैथिली मंचक प्रसिद्ध कलाकार सभ द्वारा रंगारंग सांस्कृतिक कार्यक्रम, नृत्य, आदि आयोजित होयत।
प्रो झा कहलनि, इ संस्था मैथिली भाषा भाषी सभक अछि, ई सामाजिक एवम सांस्कृतिक अछि, संस्थाकेँ राजनीतिसँ कोनो मतलब नहिं अछि, मिथिलाक विकास एवम मैथिली भाषाक संरक्षण एवम संवर्धनक लेल संघर्ष कयलक अछि आ आगू सेहो करत। कार्यक्रममे जिला जनप्रतिनिधि, सामाजिक कार्यकर्ता, शिक्षाविद् केँ सेहो आमंत्रित कयल गेल अछि, ओ मिथिलावासी एवम मिथिला-मैथिली प्रेमी सभसँ आग्रह कयलनि कि सभगोटे कार्यक्रममक सहभागी बनि सफल करथि ।
