केन्द्रीय नागरिक उड्डयन मंत्रीक राममोहन नायडू शुक्रदिन कहलनि जे वैश्विक सूचना प्रौद्योगिकी व्यवधानसँ प्रभावित एयरलाइन प्रणाली सामान्य रूपसँ काज करब शुरू कऽ देलक अछि। ओ कहलनि जे शनि दिन दुपहरिया धरि सभ मुद्दाक समाधान होयबाक सम्भावना अछि।
ओ कहलनि जे मंत्रालय यात्रा समायोजन आ रिफंडक ध्यान रखबाक लेल हवाई अड्डा आ एयरलाइन्सक संचालनक लगातार निगरानी कऽ रहल अछि।
नायडू कहलनि, “शनिदिन भोर ३ बजेसँ हवाई अड्डापर एयरलाइन प्रणाली सामान्य रूपसँ काज करब शुरू कऽ देलक अछि। उड़ान संचालन आब सुचारू रूपसँ चलि रहल अछि।” मंत्री कहलनि, “आइ दुपहरिया धरि हमरा आशा अछि जे सभ मुद्दा सुलझि जायत।”
एकटा सूत्रक अनुसार, इंडिगो, स्पाइसजेट, अकासा आ एयर इंडिया एक्सप्रेस सहित अधिकांश एयरलाइन्सक आरक्षण आ चेक-इन सिस्टम आब चालू अछि।
एयरलाइन इंडिगो कहलक जे वैश्विक व्यवधानक कारण परिचालन कठिनाई उत्पन्न भेल छल, जकर लगभग समाधान भऽ गेल अछि। मुदा, सप्ताहांतमे, ग्राहककेँ एखनो देरी आ समय-सारणीमे व्यवधानक सामना करय पड़ि सकैत अछि।
शुक्रदिन भारत सहित दुनिया भरिमे प्रौद्योगिकीमे व्यवधान आयल छल, किएक तँ माइक्रोसॉफ्टसँ सम्बन्धित एकटा तृतीय-पक्ष सॉफ्टवेयर प्लेटफार्मक “अपडेट”क कारण विंडोजसँ चलयवला उपकरण प्रभावित भेल छल।
एहि व्यवधानसँ विमानन, मीडिया आ वित्तीय सेवा प्रभावित भेल आ कतेको आन कम्पनीक संचालन प्रभावित भेल।
