बिहारक गोपालगंजमे एआईएमआईएमक राज्य सचिव आ सारण प्रभारी अब्दुल सलाम उर्फ असलम मुखियाक गोली मारि हत्या कऽ देल गेल। एआईएमआईएम प्रमुख असदुद्दीन ओवैसी पार्टी नेताक हत्यापर आक्रोश व्यक्त कयलनि।
बिहारक गोपालगंजमे अज्ञात अपराधी एआईएमआईएमक राज्य सचिव आ सारण प्रभारी अब्दुल सलाम उर्फ असलम मुखियाक गोली मारि हत्या कऽ देलक। ई घटना गोपालगंजक नगर थाना क्षेत्रक तुरकहा पुल लग एनएच-५३१ पर भेल। मृतक अब्दुल सलाम उर्फ असलम मुखिया नवंबर २०२३ मे गोपालगंज सदर सीटसँ विधानसभा उपचुनाव सेहो लड़ने छलाह आ गोपालगंज मदरसा इस्लामियाक सचिव सेहो छलाह।
कहल जा रहल अछि जे अब्दुल सलाम उर्फ असलम मुखिया अपन निकट सहयोगी फैसल इमाम मुन्नाक संग थावे जंक्शन पर लखनऊ लेल ट्रेन पकड़य जा रहल छलाह। बाटमे बाइक सवार अपराधी सभ ओवरटेक कय गोली मारि देलक। घटनाक बाद अपराधी हथियार लहराबैत भागि गेल। लगक लोकक मदतिसँ हुनका सदर अस्पतालक आपातकालीन वार्डमे आनल गेल, जतय चिकित्सक असलम मुखियाकेँ मृत घोषित कऽ देलनि।
पार्टी नेताक हत्या पर एआईएमआईएम प्रमुख असदुद्दीन ओवैसी कहलनि, “गोपालगंज उपचुनावमे एआईएमआईएमक पूर्व उम्मीदवार राज्य सचिव अब्दुल सलाम असलम मुखियाक गोली मारि हत्या कऽ देल गेल अछि। हम अल्लाहसँ प्रार्थना करैत छी जे हुनक परिवारक सदस्य सब्र-ए-जमिल अता करथि। पछिला साल दिसम्बरमे हमर सीवान जिला अध्यक्ष आरिफ जमालक गोली मारि हत्या कऽ देल गेल छल। मुख्यमंत्री नीतीश कुमार, जँ अहांकेँ कुर्सी बचाउ खेल प्रतियोगितासँ समय भेटय तऽ किछु काज सेहो करू ? केवल हमर नेताकेँ किएक निशाना बनाओल जा रहल अछि ? की ओकर परिवारकेँ न्याय भेटत ?
एतय जहिना हत्याक समाचार पसरल, पूरा क्षेत्रमे सनसनी पसरि गेल। एसपी स्वर्ण प्रभात कहलनि जे हत्याक मामिलाकेँ गम्भीरतासँ लैत सदर एसडीपीओ प्रांजलक नेतृत्वमे एकटा एसीआईटीक गठन कयल गेल अछि। डीआईयू आ एसआईटी अपराधीक खोजमे छापा मारि रहल अछि। सदर एसडीपीओक संग पुलिसक एकटा टीम सदर अस्पताल पहुँचल आ मामिलाक जाँच कऽ रहल अछि। संगहि जाहि तरहें अपराधी लोकनि हत्याक घटना कयलक, लोक पुलिस गश्ती आ कानून व्यवस्था पर सवाल उठा रहल अछि।
