राजधानी दिल्लीमे आम आदमी पार्टी (आप) आ भारतीय जनता पार्टी (भाजपा)क बीच राजनीति चरम पर अछि। आम आदमी पार्टीक विधायक खरीद-फरोख्त मामिलामे दिल्ली पुलिसक कार्रवाई जारी अछि। शनिदिन दिल्ली पुलिस अपराध शाखाक टीम द्वारा मुख्यमंत्री अरविन्द केजरीवालकेँ हुनक निवास पर नोटिस देल गेल। एकर बाद आब रविदिन एसीपीक नेतृत्वमे अपराध शाखाक मंत्री आतिशीकेँ नोटिस देबाक लेल हुनक निवास पहुँचलाह।
दिल्ली पुलिस केजरीवालक एहि आरोपपर तीन दिनक भीतर जवाब मँगलक अछि जे भाजपा आम आदमी पार्टीक सातटा विधायककेँ तोड़बाक प्रयास कयलक।
पछिला सप्ताह केजरीवाल आ आतिशी भाजपा पर अपन विधायककेँ तोड़बाक प्रयास करबाक गंभीर आरोप लगौने छलाह। केजरीवाल कहने छलाह जे भाजपा दिल्लीमे हुनकर सरकार गिराबय लेल आम आदमी पार्टीक सातटा विधायककेँ २५-२५ करोड़ टाकाक प्रस्ताव देने छल।
एकर बाद दिल्लीक मंत्री आतिशी सेहो प्रेस कॉन्फ्रेंस कऽ आरोप लगओलनि जे भाजपा दिल्लीमे ‘ऑपरेशन लोटस २.०’ शुरू कऽ देलक अछि। आतिशी कहलनि “ओ सभ एहिना पछिला साल आम आदमी पार्टीक विधायकसभकेँ पैसाक पेशकश कऽ अपना पालामे करबाक प्रयास कयने छलाह, मुदा असफल रहलाह।”
