अयोध्यामे भव्य राम मन्दिरक बाद आब माता जानकीक जन्मभूमि सीतामढ़ीक पुनौरा धाममे भव्य मन्दिर निर्माण आ एहि क्षेत्रक विकासक अभियान तेज भऽ गेल अछि। एहि अभियानमे सरकारक संग आम लोक सेहो आगू आबि रहल अछि।
हालहिमे मुख्यमंत्री नीतीश कुमार सीतामढ़ी जिलाक पुनौरा धाम मन्दिर परिसरमे लगभग ७२ करोड़ टाकाक लागतसँ होबयवला विकास कार्यक आधारशिला सेहो रखलनि अछि। भाजपा कार्यसमिति सदस्य प्रभात कुमार मिश्र दावा कयलनि जे अयोध्याक तर्ज पर बिहारक सीतामढ़ीमे माँ जानकीक भव्य मन्दिरक निर्माण कयल जायत।
ओ कहलनि जे जनसहयोगसँ माँ जानकीक भव्य मन्दिरक निर्माण आ पुनौरा धामक विकास होयत। एहिसँ पर्यटकक संख्या सेहो बढ़त आ स्थानीय स्तर पर रोजगारक अवसर सेहो पैदा होयत।
सीतामढ़ी जिलाक पुनौरा गाममे एकटा माँ जानकी जन्मभूमि मन्दिर अछि, जकरा पुनौरा धाम सेहो कहल जाइत अछि। पर्यटन विभागक माता सीताक जन्मस्थलकेँ एकटा आदर्श धार्मिक पर्यटन केन्द्रक रूपमे विकसित करय केर योजना अछि। एहिमे पुनौरा धाममे विशाल द्वार, परिक्रमा पथ, सीता वाटिका, लव कुश वाटिका, मंडप आ पार्किंग सन अनेक सुविधा तैयार कयल जायत।
भाजपा नेता प्रभात कुमार मिश्र राजनीति पर चर्चा करैत कहैत छथि जे सीतामढ़ी लोकसभा सीट १९९९ मे भाजपा लग नहिं आयल छल, मुदा एहि बेर सीतामढ़ीक आम जनताक इच्छा अछि जे भाजपा एहि सीटसँ चुनाव लड़य। भाजपा कार्यकर्ता सेहो एतय तैयारी कए लेने छथि।
