पुरीमे नंदीघोष रथपर निकललाह भगवान जगन्नाथ, राष्ट्रपति कयलनि दर्शन, पीएम पठौलनि संदेश

पुरी
*

ओडिशाक पुरीमे जगन्नाथ रथ यात्रा २०२४ केर भव्य आयोजन भेल। भारतक राष्ट्रपति द्रौपदी मुर्मू रथ यात्रामे शामिल भेलीह। ओ विश्व प्रसिद्ध रथ यात्राक अवसर पर समस्त देशवासीकेँ हार्दिक शुभकामना सेहो देलनि।

भगवान जगन्नाथक वार्षिक रथ यात्रामे ओडिशाक पुरीमे पैघ संख्यामे लोक जमा भेल छलथि। भगवान जगन्नाथ, देवी सुभद्रा आ भगवान बलभद्रक रथ यात्रामे शामिल होयबाक लेल देशभरिसँ लाखो श्रद्धालु पुरी पहुँचल छथि। रविदिन दुपहरियामे हजारो लोक पुरीमे १२म शताब्दीक जगन्नाथ मन्दिरसँ लगभग २.५ किलोमीटर दूर गुंडिचा मन्दिर दिसि विशाल रथ खींचलनि। एहि अवसर पर राष्ट्रपति द्रौपदी मुर्मू तीनू रथक परिक्रमा कयलनि आ देवतासभक समक्ष माथा टेकलनि। प्रधानमंत्री नरेन्द्र मोदी सेहो रथ यात्राक अवसर पर देशवासीकेँ बधाई देलनि। राष्ट्रपति कहलनि, “भगवान जगन्नाथक विश्व प्रसिद्ध रथ यात्राक अवसर पर हम सभ देशवासीकेँ हार्दिक बधाई आ शुभकामना दैत छी। आइ देश आ दुनियाक अनगिनत जगन्नाथ प्रेमी रथ पर बैसल भगवानक तीनू रूप देखबाक उत्साहपूर्वक प्रतीक्षा कऽ रहल छथि। एहि महापर्वक अवसर पर ओ महाप्रभु श्री जगन्नाथसँ सबहक सुख, शान्ति आ समृद्धिक लेल प्रार्थना करैत छथि। जय जगन्नाथ!”

एहिसँ पहिने पुरीक शंकराचार्य स्वामी निश्चलानन्द सरस्वती अपन शिष्यसभक सङ्ग भगवान जगन्नाथ, भगवान बलभद्र आ देवी सुभद्राक रथक दर्शन कयलनि आ पुरीक राजा ‘छेरा पहानरा’ (रथ सफाई)क अनुष्ठान पूरा कयलनि, जकर बाद साँझ लगभग ५.२० बजे रथ खींचबाक प्रक्रिया प्रारम्भ भेल। रथमे लकड़ीक घोड़ा लगाओल गेल आ सेवादार पायलटसभ भक्तलोकनिकेँ रथकेँ सही दिशामे खींचबाक लेल मार्गदर्शन कयलनि।

राष्ट्रपति द्रौपदी मुर्मू , ओडिशाक राज्यपाल रघुबर दास, ओडिशाक मुख्यमंत्री मोहन चरण माझी आ केन्द्रीय मंत्री धर्मेन्द्र प्रधान मुख्य जगन्नाथ रथकेँ जोड़यवला रस्सी खींचि प्रतीकात्मक रूपसँ ई यात्रा आरम्भ कयलनि।

नेता प्रतिपक्ष नवीन पटनायक सेहो भाय-बहिनक देवताक दर्शन कयलनि। हजारो लोक भगवान बलभद्रक काठक लगभग ४५ फीट ऊँच रथकेँ खींचलनि।

रथ उत्सवक नामसँ सेहो जानल जायवला भगवान जगन्नाथ, देवी सुभद्रा आ भगवान बलभद्र एहि यात्राक दौरान अपन मौसी देवी गुंडिचा देवीक मन्दिरमे जाइत छथि। रथ यात्रा आठ दिनक बाद हुनक वापसीक सङ्ग समाप्त होइत अछि। वापसी उल्टा रथक नामसँ जानल जाइत अछि।
रथकेँ जगन्नाथ मन्दिरक सिंहद्वारसँ गुंडिचा मन्दिर धरि लऽ जायल जायत, जतय रथ एक सप्ताह धरि रहत। रथ यात्राकेँ देखैत पैघ संख्यामे श्रद्धालु जमा भेल छथि आ उचित तरीकासँ अनुष्ठानक आयोजन कयल गेल अछि।

प्रधानमंत्री नरेन्द्र मोदी रथ यात्राक अवसर पर अपन शुभकामना देलनि। ओ लिखलनि, “पवित्र रथ यात्रा शुरू भेला पर बधाई। हम महाप्रभु जगन्नाथकेँ प्रणाम करैत छी आ प्रार्थना करैत छी जे हुनक आशीर्वाद सदैव हमरासभक सङ्ग रहय।”