लोकसभामे प्रतिपक्षक नेताक प्रश्नपर राष्ट्रवादी कांग्रेस पार्टीक प्रमुख शरद पवार बृहस्पति दिन कांग्रेसक पालामे गेन्द राखि देलनि। ओ कहलनि जे लोकसभामे प्रतिपक्षक नेताक नियुक्तिक निर्णय कांग्रेस द्वारा कयल जायत कियैक तँ संसदक निचला सदनमे इंडिया ब्लॉक दलमे ओकर सबसँ बेसी सीट अछि।
ई पूछला पर कि लोकसभाक उपाध्यक्षकेँ विपक्षसँ प्राप्त करबाक प्रयास होयत, पवार दावा कयलनि जे प्रधानमंत्री नरेन्द्र मोदी अपन पछिला सरकारमे एहि “नियम”क पालन नहिं कयलनि। ओ कहलनि, “ओहि बिन्दु पर चर्चा होयत, मुदा हमरा नहिं लगैत अछि जे एकर कोनो सार्थक परिणाम होयत।”
पवार महाराष्ट्रक पुणे जिलाक बारामतीमे संवाददाता सभसँ बातचीत कऽ रहल छलाह। भाजपा हालहिमे भेल ५४३ सदस्यीय लोकसभाक चुनावमे २४० सीट जीतलक आ राष्ट्रीय जनतांत्रिक गठबंधन (एनडीए)मे अपन सहयोगी दलक सङ्ग सरकार बनौलक।
विपक्षी इंडिया ब्लॉकक घटकमे कांग्रेसकेँ सबसँ बेसी ९९ सीट भेटल अछि। लोकसभामे प्रतिपक्षक नेताक नियुक्तिक विषयमे पूछल गेलापर पवार कहलनि, “पहिने हमसभ सहमत छलहुँ जे ई पद सबसँ बेसी सीट वला पार्टीकेँ देल जायत। आइ कांग्रेस लग सबसँ बेसी सीट (विपक्षी दलमे) अछि, तेँ ओ तय करथि जे केकरा पद धारण करबाक चाही।” आगू ओ कहलनि, “कांग्रेसक फैसलाक बाद ओकरा हमर (इंडिया) गुटक सहमतिक आवश्यकता होयत।”
महाराष्ट्रमे लोकसभा चुनावमे विपक्षी महा विकास अघाड़ी (एमवीए)क सफलतापर पवार दावा कयलनि जे लोकक पीएम मोदीसँ विश्वास खतम भऽ गेल अछि आ “मोदी गारंटी” फर्जी साबित भेल अछि। ओ कहलनि, “राज्यक लोक एहि निष्कर्ष पर पहुँचल अछि जे पछिला पाँच सालक दौरान ओ जे वचन देलनि ओ पूरा नहि भेल अछि।”
एमवीए, जाहिमे कांग्रेस, उद्धव ठाकरेक शिवसेना (यूबीटी) आ एनसीपी (एसपी) सम्मिलित अछि, राज्यक ४८ लोकसभा सीटमेसँ ३० सीट जीतलक अछि। सत्तारूढ़ महायुति, जाहिमे भाजपा, मुख्यमंत्री एकनाथ शिंदेक नेतृत्ववला शिवसेना आ उपमुख्यमंत्री अजित पवारक नेतृत्ववला एनसीपी सम्मिलित अछि, १७ सीट जितलक अछि।
