आम आदमी पार्टीकेँ आब दिल्ली आबकारी नीति मामलामे आरोपी बनाओल जायत। जांच एजेंसी अदालतकेँ कहलक जे ओ अपन आरोपपत्रमे आम आदमी पार्टीकेँ आरोपी बनाबय जा रहल अछि। जांच एजेंसीक ई निर्णय देशक एकटा अनूठा मामिला होयत। भारतक इतिहासमे पहिल बेर कोनो राजनीतिक दलपर भ्रष्टाचारक आरोप लगाओल जायत।
वास्तवमे दिल्ली शराब नीति मामिलामे ईडी पूर्व उप मुख्यमंत्री मनीष सिसोदिया, संजय सिंह आ अरविंद केजरीवाल सहित कतेको नेताकेँ गिरफ्तार कयलक अछि। मुदा राज्यसभा सांसद संजय सिंह जमानत पर बाहर आबि गेल छथि। दिल्लीक मुख्यमंत्री अरविन्द केजरीवाल एहि गिरफ्तारीकेँ सर्वोच्च न्यायालयमे चुनौती दैत एकरा अवैध कहलनि अछि। सुनवाईक दौरान अदालत केजरीवालकेँ अंतरिम जमानत देलक अछि, जाहिसँ लोकसभा चुनावक लेल राहत भेटल अछि। ओ १ जून तक बाहर छथि।
आब ईडी दिल्ली उच्च न्यायालयमे कहलक जे ओ आम आदमी पार्टीकेँ आरोपी बनाओत। एकरा लेल ई पूरक आरोपपत्र दाखिल करत। ईडीक एहि निर्णयसँ इतिहासमे ई पहिल बेर होएत जे कोनो राजनीतिक दलकेँ आरोपी बनाओल गेल होय।
