प्रधानमंत्री नरेन्द्र मोदी सैम पित्रोदाक बयान पर कांग्रेसक मंशा पर हमला करैत कहलनि अछि कि, जे सभ पूरा कांग्रेस पार्टीकेँ अपन पैतृक सम्पत्ति मानि अपन बच्चाकेँ दऽ देलनि ओ सभ नहिं चाहैत छथि जे कोनो साधारण भारतीय अपन सम्पत्ति अपन बच्चासभकेँ देथि।
ओ कहलनि जे कांग्रेस माता-पितासँ भेटल विरासत पर सेहो कर लगाबय चाहैत अछि, अर्थात कांग्रेसक मंत्र अछि – कांग्रेसक लूट, जीवनक संगो आ जीवनक बादो ।
छत्तीसगढ़क सरगुजामे एकटा चुनावी जनसभाकेँ सम्बोधित करैत प्रधानमंत्री नरेन्द्र मोदी कहलनि जे कांग्रेस पार्टीक खतरनाक इरादा एकक बाद एक सामने आबि रहल अछि। शाही परिवारक राजकुमारक एकटा सलाहकार, जे हुनक पिताक सलाहकार सेहो छलाह, किछु समय पहिने कहलनि जे मध्यम वर्गपर आर बेसी कर लगेबाक चाही। आब ई लोक आर एक डेग आगू बढ़ि गेल अछि।
पीएम मोदी कहलखिन, आब कांग्रेस कहैत अछि जे ओ विरासत कर लगाओत, अर्थात माता-पितासँ प्राप्त विरासत पर सेहो कर लगाओत। अहाँ जे मेहनतसँ संपत्ति जमा करैत छी ओ अहाँक बच्चासभकेँ नहिं भेटत, बल्कि कांग्रेस सरकारक पंजा ओहो अहाँसँ छीन लेत।
ओ व्यंग्यात्मक रूपसँ कहलनि जे ई परिवार ओही सलाहकारक सलाहक पालन करैत अछि।
प्रधानमंत्री मोदी कांग्रेस पर अपन हमला जारी राखैत आगू कहलनि जे जाबत धरि अहाँ जीवित छी, कांग्रेस अहाँकेँ बेसी करसँ मारत आ जखन अहाँ जीवित नहिं रहब तखन ओ अहाँपर विरासत करक बोझ थोपि देत।
दरअसल, सैम पित्रोदा कहलनि अछि जे अमेरिकामे ५५ प्रतिशत विरासत कर लगाओल जाइत अछि। सरकार ५५ प्रतिशत हिस्सेदारी लैत अछि। ओ कहलनि जे सम्पत्ति जनताक लेल छोड़ि देबाक चाही। जँ कोनो व्यक्तिक लग १० करोड़ डॉलरक सम्पत्ति अछि तँ ओकर मृत्युक बाद ४५ प्रतिशत सम्पत्ति ओकर बच्चासभकेँ आ ५५ प्रतिशत सरकारकेँ भऽ जाइत अछि। ओ कहलनि “भारतमे एहन कानून नहिं अछि। एहन मुद्दा पर चर्चा होएबाक चाही आ ओ एहेन नीतिक बात कय रहल छथि जे लोकक हितमे होय नहिं कि मात्र अमीरक हितमे।
