प्रधानमंत्री नरेन्द्र मोदी सोमदिन नई दिल्लीक पूसामे राष्ट्रीय कृषि अनुसंधान संस्थानमे ‘सशक्त नारी-विकास भारत’ कार्यक्रममे भाग लेलनि आ ‘नमो ड्रोन दीदी’ द्वारा कृषि क्षेत्रमे ड्रोनक उपयोगक प्रदर्शन देखलनि। एहि आयोजनक क्रममे प्रधानमंत्री १००० सँ बेसी ‘नमो ड्रोन दीदी’केँ ड्रोन सेहो सौंपलनि। संगहि एहि कार्यक्रममे विभिन्न राज्यक कतेको महिला लोकनि भाग लेलनि।
ई कार्यक्रम आइ महिलासभकेँ सशक्त आ आत्मनिर्भर बनयबाक एकटा आओर पहल छल। ई योजना महिलासभकेँ आधुनिकताक सङ्ग कृषिमे योगदान देबाक लेल शुरू कयल गेल अछि। एकरा लेल सरकार मुफ्त प्रशिक्षण सेहो दऽ रहल अछि।
ओतहि केंद्रीय मंत्री मनसुख मंडाविया कहलनि, “स्वयं-सहायता समूहक १५,००० महिलाकेँ ड्रोन दीदी बनाबय केर लक्ष्य राखल गेल अछि आ एहि नमो ड्रोन बहिन सभकेँ प्रशिक्षण देल गेल अछि। आइ सेहो हम १०९४ नमो ड्रोन दीदीकेँ ड्रोन उपलब्ध करा रहल छी, जखन ई १५,००० ड्रोन दीदी द्वारा उड़ायल जायत, तखन ई नहिं केवल रोजगारक नव अवसर पैदा करत, बल्कि लाखों परिवारकेँ सशक्त सेहो करत।”
एहि आयोजनक मुख्य विशेषतासभमे नमो ड्रोन दीदी द्वारा भारतभरिमे कृषि ड्रोनक प्रदर्शन सेहो शामिल अछि। संगहि, स्वयं-सहायता समूहकेँ या तँ बैंक ऋणक रूपमे वा पूँजीकरण सहायता कोषक माध्यमसँ १०,००० करोड़ टाका देल गेल। एहि कार्यक्रममे पीएम मोदी रिवाॅल्विंग फंड, सामुदायिक निवेश फंड आ बैंक ऋण सेहो वितरित कयलनि।
