झारखण्ड सरकार बुधदिन महिला आ अनुसूचित जाति आ अनुसूचित जनजाति (एससी/एसटी)क लोकक लेल ५० सालक आयुसँ पेंशन योजना शुरू कयलक।
मुख्यमंत्री चंपई सोरेन रांचीक खेलगांवमे आयोजित कार्यक्रममे एहि योजनाक तहत लगभग १ लाख ५८ हजार लाभार्थीक खातामे पेंशनक पहिल किस्तक रूपमे डीबीटी केर माध्यमसँ ३१.६ करोड़ रुपया हस्तांतरित कयलनि।
सरकार एकरा सर्वजन पेंशन योजना नाम देलक अछि। एखन धरि पूरा राज्यमे एहि योजनाक तहत २ लाख २२ हजार लाभार्थीक चयन कयल जा चुकल अछि। पहिने पेंशनक लेल न्यूनतम आयु सीमा ६० वर्ष छल। नवम्बरमे सरकार महिला आ अनुसूचित जाति आ अनुसूचित जनजातिक लेल न्यूनतम आयु सीमा बढ़ाकऽ ५० वर्ष कऽ देलक।
आब पूरा राज्यमे लगभग २७ लाख लोककेँ पेंशनक लाभ भेटि रहल अछि। मुख्यमंत्री बुधदिन विधवा पुनर्विवाह योजनाक शुभारंभ सेहो कयने छलथि। एकर तहत पात्र महिलाकेँ सरकारसँ दू लाख रुपयाक आर्थिक सहायता देल जायत।
सरकारी नौकरी, पेंशनधारी आ आयकरदाताक श्रेणीमे आबयवाला विधवाकेँ एहि योजनाक लाभ नहिं भेटत।
एहि अवसर पर मुख्यमंत्री कहलनि जे देशमे पहिल बेर हमर सरकार ओहि विधवाक पुनर्विवाहकेँ प्रोत्साहित कऽ रहल अछि जिनकर जीवन भरिसख ठप भऽ गेल अछि। हमर सरकार आर्थिक सहायता प्रदान करबाक लेल देशक एकल महिला आ निराश्रित परित्यक्त महिलासभकेँ पेंशन देब सेहो शुरू कऽ देने छल। एहि योजना सभक शुभारम्भ लेल आयोजित कार्यक्रममे मंत्री बेबी देवी सेहो उपस्थित छलीह।
