शाहजहांक गिरफ्तारी पर कोनो रोक नहिं : संदेशखली पर कोलकाता हाईकोर्टक दू टूक

कोलकाता
*

कलकत्ता उच्च न्यायालय कहलक अछि जे संदेशखली मामिलामे शाहजहाँ शेखक गिरफ्तारीपर कोनो रोक नहिं अछि आ हुनका गिरफ्तार कयल जेबाक चाही। उच्च न्यायालय ई बात संदेशखाली विवाद पर दायर याचिका पर सुनवाईक दौरान कहलक। “हम ई स्पष्ट करय चाहैत छी जे शाहजहां शेखक गिरफ्तारी पर कोनो रोक नहिं अछि। एफ.आई.आर.मे शाहजहाँ शेखक नाम सेहो अभियुक्तक रूपमे अछि। एहन स्थितिमे हुनका गिरफ्तार करबाक जरूरत अछि। न्यायालय कहलक जे शाहजहां शेख, प्रवर्तन निदेशालय, केन्द्रीय अन्वेषण ब्यूरो (सीबीआई) आ राज्यक गृह सचिवकेँ एहि मामिलामे पक्षकार बनाओल जयबाक चाही। मुख्य न्यायाधीश टी.एस. शिवगणनमक नेतृत्ववला पीठ निर्देश देलक जे उच्च न्यायालय रजिस्ट्री द्वारा अखबारमे सार्वजनिक नोटिस देल जाय, जाहिमे कहल जाय जे शेखकेँ एहि मामिलामे पक्षकार बनाओल गेल अछि, किएक तँ ओ फरार अछि आ ५ जनवरीकेँ प्रवर्तन निदेशालय पर भीड़क हमलाक बादसँ सार्वजनिक रूपसँ नहि देखल गेल अछि।

उच्च न्यायालयक ई टिप्पणी एहन समयमे आयल अछि जखन टीएमसी सांसद अभिषेक बनर्जी रविक राति एकटा वक्तव्यमे कहलनि जे बंगालक सरकार अदालतक आदेशक कारण शाहजहाँ शेखकेँ गिरफ्तार नहिं कऽ पाबि रहल अछि। अदालतक आदेशसँ पुलिसक हाथ बान्हल अछि। अभिषेक बनर्जीक बयानकेँ विपक्षी भाजपा द्वारा निशाना बनाओल गेल आ एकरा अदालतक अवमानना कहल गेल।
सन्देशखलीमे जमीन हड़पबाक आ महिलासभक यौन शोषणक आरोप लागल अछि। स्थानीय लोकनि शाहजहाँ शेख आ टीएमसीक अन्य नेतासभ पर गम्भीर आरोप लगओलनि अछि। शाहजहां शेख ५ जनवरीसँ फरार अछि। शेख बंगाल राशन घोटालामे सेहो आरोपी छथि आ ईडीक टीम एहि मामिलामे पूछताछ लेल ५ जनवरीकेँ शाहजहां शेखक ठिकानापर छापा मारय गेल छल, मुदा शाहजहां शेखक समर्थक ईडीक टीमपर हमला कयलक। ईडीक टीम पर हमलाक संबंधमे शाहजहां शेखक खिलाफ एकटा मामिला सेहो दर्ज कयल गेल अछि। आब शाहजहां शेख संदेशखाली मामिलामे सेहो आरोपी छथि, मुदा हुनका एखन धरि गिरफ्तार नहिं कयल गेल अछि। बशीरहाट एसपी एचएम रहमान कहलनि, हमरा शाहजहां शेखक विरुद्ध शिकायत भेटल अछि, कारवाई कय रहल छी, एफआईआर दर्ज कयलौंह अछि।