इमरान खान पूरा चुनाव परिणाम आबयसँ पहिने जारी कयलनि पाकिस्तानमे जीतक भाषण

१५ सीट पर एखनहुँ फँसल पेंच
*
नई दिल्ली
*

पाकिस्तानक आम चुनावक परिणाम एखन धरि पूर्ण रूपसँ घोषित नहि भेल अछि, मुदा ओहिसँ पहिने पीटीआईक संस्थापक इमरान खान जेलसँ देशक जनताकेँ जीतक संदेश जारी कऽ दू तिहाई बहुमतक दावा कयने छथि। दरअसल, पाकिस्तानक पूर्व प्रधानमंत्री इमरान खान एखन अदियाला जेलमे कैद छथि। इमरान जेलसँ एआई निर्मित ‘जीतल’ भाषण देलनि। पाकिस्तान निर्वाचन आयोग (ईसीपी)क अनुसार, पीटीआई समर्थित निर्दलीय उम्मीदवार एखन धरि घोषित २५० सीटमेसँ ९९ सीटपर जीत हासिल कऽ चुकल अछि। पीएमएल-एन ७१, पीपीपी ५३, एमक्यूएम १७ सीट आ अन्य १० सीट जितलक। १५ सीट पर एखन धरि परिणाम घोषित नहिं भेल अछि।

एक्स पर पूर्व प्रधानमंत्री कहलनि, “प्रिय पाकिस्तानी, अहाँ मतदान कऽ स्वतंत्रताक नींव रखलहुँ अछि। हम अहां सबके २०२४ केँ चुनाव जीतबाक लेल बधाई दैत छी। अहां लंदन योजनाकेँ विफल कए देलहुं। धांधलीसँ पहिने हम १५० सँ बेसी नेशनल असेंबली सीट पर जीत रहल छलहुं।
फॉर्म 45 केर अनुसार हम १७० सँ बेसी सीट जीत रहल छी। नवाज शरीफपर कियो भरोसा नहिं करत, जे ३० सीटपर पिछड़लाक बादो विजयी भाषण देलनि। अंतर्राष्ट्रीय मीडिया सेहो एहि मुद्दा पर लिखि रहल अछि।”

पाकिस्तान निर्वाचन आयोग (ईसीपी) एखन धरि अंतिम परिणामक घोषणा नहिं कयने अछि। ओना, पीटीआई आ पीएमएल-एन आम चुनावमे जीतक दावा कयलक अछि। स्थानीय मीडियाक कहब अछि जे २६६ सीटमेसँ २५० सीटपर परिणाम आयल अछि। परिणामक अनुसार, पाकिस्तान तहरीक-ए-इंसाफ (पीटीआई) द्वारा समर्थित निर्दलीय उम्मीदवार ९७ सीटपर आगू छल। ओना, सोशल मीडिया पर एहन कतेको वीडियो वायरल भऽ रहल अछि जाहिमे कहल जा रहल अछि जे परिणाममे कथित रूपसँ हेरफेर कयल गेल अछि। लोकक आरोप अछि जे एहि धांधलीमे सेनाक खुजल हाथ अछि। पछिला घटनाक्रमकेँ देखैत इमरान खान आ सेना प्रमुखक बीच दुश्मनी, इमरानक कुर्सीक बीच अवरोध बनल अछि।