होर्मुजमे अमेरिकी कार्यवाहीसँ नाराज ईरान, ट्रंपकेँ देलक धमकी

नई दिल्ली। समदिया

पश्चिम एशियाक स्थिति तेजीसँ बिगड़ि रहल अछि। अमेरिका-ईरानक टकराव खुला भ गेल अछि। होर्मुज जलडमरूमध्यमे अमेरिकाक कार्यवाहीक बाद ईरान दृढ़ रुख अपना कय साफ कय देलक कि ओ फिलहाल शांति वार्तामे भाग नहि लेत। अमेरिकी राष्ट्रपति ट्रंपकेँ सीधा निशाना बनाबैत ईरान कहलक कि वाशिंगटन अपन पिछला अनुभवसँ कोनो सबक नहि सीखलक अछि आ एकर आब गंभीर परिणाम सामने आबि सकैत अछि।

ईरानी विदेश मंत्रालय केर प्रवक्ता इस्माइल बघाई एगो प्रेस कॉन्फ्रेंसमे कहलनि कि अमेरिकाक संग अगिला दौरक बातचीतक संबंधमे अखन धरि कोनो फैसला नहि कयल गेल अछि। ओ अमेरिका पर दोहरी मानकक आरोप लगौलनि आ कहलनि कि एक दिस कूटनीतिक बात करैत अछि आ दोसर दिस सैन्य कार्यवाहीक सहारा लैत अछि। बघाई केर कहब छलनि जे एहन विरोधाभासी काज विश्वासक क्षीण करैत अछि आ स्थितिकेँ आओर खराब करत।

दरअसल, अमेरिका होर्मुज लग ओमानक खाड़ीमे ईरानी मालवाहक जहाज टोस्काकेँ रोकी कय जब्त कय लेलक। राष्ट्रपति ट्रंपक अनुसार जहाजकेँ बेर-बेर चेतावनी देल जाय रहल छल, मुदा ई जहाज आदेशक अवहेलना कयलक। एकर बाद अमेरिकी नौसेना जहाज केर इंजन रूमकेँ निशाना बनाबैत ओकरा रोकलक आ मरीन कमांडो जहाज पर कब्जा कय लेलक। ईरान एही कार्यवाहीकेँ सीधा हमला बतैलक।

ईरानी सैन्य अधिकारी सभक कहब छनि कि ई कार्यवाही हालक युद्धविरामक उल्लंघन अछि। ओ सभ कहलनि जे, जहाज चीनसँ ईरान जा रहल छल आ व्यापारिक जहाज छल। ईरान एकरा समुद्री डाकू बतबैत चेतावनी देलक जे ओ जल्दिये एकर जवाब देत। ईरान ईहो कहलक कि अमेरिका दू बेर कूटनीतिक संग धोखा कयलक।

ईरानक रिवोल्यूशनरी गार्ड घोषणा कयलक होर्मुज जलडमरूमध्यकेँ फेर सँ बंद कय देल गेल अछि। हुनक कहब अछि कि जा धरि अमेरिका ईरानी बंदरगाह पर नाकाबंदी नहि हटाबैत अछि, ई मार्ग बंद रहत। ई दुनिया केर लगभग 20 प्रतिशत तेल केर एगो प्रमुख मार्ग अछि, एही लेल एकरा बंद भेलासँ वैश्विक बाजार लेल एगो पैघ खतरा अछि।

एम्हर दक्षिण लेबनानक स्थिति आओर खराब भ गेल अछि। संयुक्त राष्ट्र केर शांति सेना पर हमलामे फ्रांस केर एगो सैनिकक मृत्यु भ गेल आ कतेको लोक घायल भ गेल। हालांकि हिजबुल एहि हमलासँ इनकार कय देलक अछि। ओतहि इजरायल युद्धविरामक बावजूद लेबनान पर हवाई हमला केलक अछि। हिजबुल केर नेता नैम कासेम कहलनि कि एकतरफा युद्धविराम काज नहि करत आ एकर जवाबी कार्यवाही कयल जायत।

अमेरिका इस्लामाबादमे वार्ताक प्रस्ताव रखलक, मुदा ईरान एहिमे भाग लेबय लेल तैयार नहि भेल अछि। ईरानक कहनाय अछि जे ओ अपन राष्ट्रीय हितक आधार पर कोनो फैसला लेत। वर्तमान स्थितिकेँ देखैत कूटनीतिक मार्ग कठिन बुझाइत अछि। पश्चिम एशियामे बढ़ैत ई तनाव वैश्विक शांति आ अर्थव्यवस्था दुनू लेल खतरा पैदा कय रहल अछि। होर्मुज जलडमरूमध्य जँका महत्वपूर्ण मार्ग पर टकरावसँ तेल केर आपूर्ति पर असर पड़ि सकैत अछि आ आबय वला दिनमे स्थिति आओर खराब भ सकैत अछि।