यूपीए सरकार कोयला केर राखमे बदललक आ हम बदललौंह कोयला केर हीरामे – सीतारमण
*
नई दिल्ली
*
लोकसभामे शुक्रदिन केन्द्रीय वित्त मंत्री निर्मला सीतारमण द्वारा नियम ३४२क अन्तर्गत लोकसभामे प्रस्तुत भारतीय अर्थव्यवस्थापर श्वेत पत्रपर चर्चा शुरू भेल। केन्द्रीय वित्त मंत्री निर्मला सीतारमण शुक्रदिन सदनमे श्वेत पत्र पर चर्चाक लेल प्रस्ताव प्रस्तुत करैत कहलनि, “ई सदन भारतीय अर्थव्यवस्था आ भारतक लोकक जीवन पर एकर प्रभाव पर श्वेत पत्रपर विचार करत।”
एहिसँ पहिने लोकसभा अध्यक्ष ओम बिड़ला कहलनि जे आइ सदन दिन भरि अर्थव्यवस्थापर प्रस्तुत श्वेत पत्रपर चर्चा करत।
लोकसभामे श्वेत पत्र पर चर्चाक लेल निर्धारित समय चारि घंटा अछि। मुदा, वक्ताक संख्याक आधार पर एहि समयकेँ सेहो बढ़ायल जा सकैत अछि।
लोकसभामे श्वेत पत्र पर चर्चाक लेल प्रस्ताव प्रस्तुत करैत वित्त मंत्री निर्मला सीतारमण कहलनि जे यूपीए सरकार देशक अर्थव्यवस्थाकेँ गम्भीर आ बहुत खराब स्थितिमे छोड़ि देने छल। एकरा २०१४ मे प्रधानमंत्री बनलाक बाद नरेन्द्र मोदी उबारलाह आ आइ देश दुनियाक पाँचम सबसँ पैघ अर्थव्यवस्था बनि गेल अछि।
यूपीए सरकारक कार्यकालमे भेल घोटालाक उल्लेख करैत ओ कहलनि जे २००८क संकटकालमे यूपीए सरकार देशकेँ बचाबय लेल किछु नहिं कयलक, जखन कि देश आ दुनिया देखलक जे कोना भारत प्रधानमंत्री नरेन्द्र मोदीक नेतृत्वमे कोविडक वैश्विक संकटक सामना कयलक, भारतीय अर्थव्यवस्थाक विकासक गतिकेँ तेज कयलक आ जी-२० शिखर सम्मेलनसँ दुनिया भरिमे भारतक सम्मान बढ़ल।
यूपीए सरकारक कार्यकालमे घोटाला आ कुप्रबंधनक सूची सूचीबद्ध करैत ओ कहलनि जे यूपीए सरकार देशकेँ नष्ट कऽ देलक। यूपीए कोयलाकेँ राखमे बदलि देने छल, मुदा मोदी सरकार अपन तपसँ कोयलाकेँ हीरामे बदलि देलक।
दिनभरिक चर्चाक बाद केन्द्रीय वित्त मंत्री निर्मला सीतारमण द्वारा सरकारक तरफसँ एकर समापन पर जबाब सेहो देल गेल।
ज्ञातव्य जे बृहस्पतिकेँ संसदमे प्रस्तुत अपन श्वेत पत्रमे सीतारमण यूपीए सरकारक कार्यकालक दौरान कुप्रबंधन आ घोटालाक उल्लेख कयलनि, यूपीए सरकारक कार्यकालमे यानी २०१४ सँ पहिने भारतक अर्थव्यवस्थाक स्थिति कोना कमजोर छल आ २०१४ मे नरेंद्र मोदीक प्रधानमंत्री बनलाक बाद मोदी सरकार अर्थव्यवस्थासँ जुड़ल चुनौतीकेँ कोना पार केलक। एनडीएक १० सालक कार्यकालमे भारत दुनियाक शीर्ष पाँच अर्थव्यवस्थामे शामिल भऽ गेल अछि।
