हल्द्वानीमे मदरसा आ मस्जिद ढ़ाहला पर भेल हिंसामे चारि गोटेकेँ मृत्यु

नैनीताल
*

उत्तराखंडक नैनीताल जिलाक हल्द्वानी शहरमे मदरसामे बुलडोजरक कार्रवाईकेँ लऽ कऽ भेल हिंसामे एखन धरि ४ लोकक मृत्यु भऽ चुकल अछि आ १०० सँ बेसी लोक घायल भऽ चुकल छथि। बृहस्पति दिन अर्थात ८ फरवरी,२०२४ कऽ जखन पुलिस प्रशासनक टीम बनभूलपुरा क्षेत्रमे बनल मदरसा आ मस्जिदकेँ हटाबय लेल कार्रवाई लेल पहुँचल, तखन स्थानीय लोकनि विरोध कयलनि आ पथराव शुरू कऽ देलनि। स्थिति खराब भऽ गेल आ घर आ दोकानमे तोड़फोड़, आगजनी आ गोलीबारीक घटना सोझाँ आबय लागल। पूरा शहरमे तनाव पसरि गेल, जकर बाद कर्फ्यू लगाबय पड़ल आ दंगा करयवलाकेँ देखाइत गोली मारबाक आदेश जारी कयल गेल। एहि घटनाक बादसँ शहरमे बहुत संवेदनशील वातावरण बनल अछि।

नैनीतालक डीएम वंदना सिंह कहलनि जे हल्द्वानीमे हिंसा योजना बना कऽ भेल। पुलिस टीम पर हमला करबाक लेल पहिनेसँ पाथर राखल गेल छल। हिंसाक कारण शहरमे कर्फ्यू लगा देल गेल अछि आ कोना-कोना पर पुलिस सेहो तैनात कयल गेल अछि।

बृहस्पति कऽ हल्द्वानीमे पुलिस प्रशासनक एकटा टीम बनभूलपुरा क्षेत्रमे नजूल जमीन अर्थात जाहि पर मालिकाना हक केकरो नहिं होय, पर बनल मदरसा आ मस्जिद हटाबय लेल गेल। प्रशासनक कहब अछि जे मदरसा आ मस्जिदक निर्माण अवैध रूपसँ कयल गेल अछि। उच्च न्यायालय हुनका हटयबाक आदेश देने छल, जाहि पर कार्रवाई करैत टीम ओतय पहुँचल। स्थानीय लोक एकर विरोध करए लागल। पहिने पुलिस टीम पर पाथर फेकल गेल आ फेर पूरा शहरमे हिंसा पसरि गेल।
जहिना टीम मदरसा आ मस्जिद पर अतिक्रमणक खिलाफ कार्रवाई करय लागल, महिला आ स्थानीय निवासीक गुस्सायल भीड़ विरोधमे सड़क पर उतरि गेल आ पुलिसकर्मीसँ बहस भऽ गेल। तखन नारा लगाओल गेल आ टीम पर पाथर फेकल गेल। देखिते-देखिते स्थिति तनावपूर्ण भऽ गेल आ दंगा शुरू भऽ गेल।

उच्च न्यायालय बनभूलपुरा क्षेत्रमे नजूलक जमीन पर बनल मस्जिद आ मदरसाकेँ हटयबाक आदेश देने छल। स्थानीय लोक एहि आदेश पर पुलिस प्रशासनक कार्रवाईक विरोध कऽ रहल छलाह। आक्रोशित भीड़केँ नियंत्रित करबाक लेल पुलिस आंसू गैसक गोला छोड़लक, लाठीचार्ज कयलक, मुदा हंगामा बढ़य लागल। तखन रामनगरसँ अतिरिक्त बल बजाओल गेल। अनियंत्रित भीड़ आगजनी कयलक, घर आ दोकानमे तोड़फोड़ कयलक, दर्जनो गाड़ीमे आगि लगा देलक, जकर बाद क्षेत्रमे कर्फ्यू लगा देल गेल।

डीएम वंदना सिंह कहलनि जे उच्च न्यायालय हल्द्वानीमे अवैध निर्माणकेँ हटयबाक निर्देश देने छल। बनभूलपुरा क्षेत्रमे तीन एकड़ जमीनपर मदरसा आ मस्जिदक निर्माण अवैध रूपसँ कयल गेल छल। प्रशासन कहलक जे ३० जनवरीकेँ नगर निगम एकरा ध्वस्त करबाक नोटिस देलक आ ई जमीन नगर निगम पहिनेसँ कब्जा कऽ लेलक आ एकरा सील कऽ देलक।
आगू वंदना सिंह कहलनि जे ई एकटा खाली सम्पत्ति छल, जाहि पर दूटा भवन बनाओल गेल छल। किछु लोक एकरा मदरसा आ नमाज स्थल कहैत छथि, मुदा ई धार्मिक संरचनाक रूपमे पंजीकृत नहिं अछि, आ ने हुनका सभ लग एहन कोनो मान्यता अछि। ओ कहलनि जे लोक एकरा मलिकक बगीचाक रूपमे जानैत छथि मुदा कागजमे एकर कोनो रिकार्ड नहिं अछि।
पुनः सिंह कहलनि जे ३० जनवरीकेँ एहि भवनसभकेँ हटयबाक निर्देश जारी कयल गेल आ हुनका सभकेँ तीन दिनक भीतर खाली करबाक नोटिस देल गेल – एकरा हटाओल जायत।

मदरसा चला रहल संस्था एहि कार्रवाईक विरुद्ध उच्च न्यायालयमे गेल छल, जतय हुनकर याचिका खारिज कऽ देल गेल छल। एकर बाद बृहस्पति दिन दुपहरिया १ बजे पुलिस टीम बुलडोजर लऽ कऽ कार्रवाई लेल पहुँचल।
आगू वंदना सिंह कहलनि जे आधा घंटाक भीतर पैघ संख्यामे लोक जमा भऽ गेल आ पथराव शुरू कऽ देलक। पहिल हमला नगर निगमक टीम पर भेल छल। चारु दिससँ घरक छतसँ पाथर बरसैत छल। ओ कहलनि जे ३० जनवरीसँ पहिने छत पर कोनो पत्थर नहिं छल। जखन अदालतमे कार्यवाही चलि रहल छल तखन छत पर पाथर जमा कयल गेल छल। वंदना सिंह कहलनि, अर्थात ई सब योजना बनाओल गेल छल जे जखन विध्वंसक कार्रवाई होयत तखन हमसभ फोर्स पर एहि तरहेँ हमला करब आ डिमोलेराइज करबाक प्रयास करब।
वंदना सिंह बतौलनि जे पाथरसँ हमला भेल आ जखन हमर टीम पाछू नहिं हटल, तखन पहिल भीड़ आयल पाथरक संग, जकरा तितर-बितर कऽ देल गेल। तखन एकटा आओर भीड़ आयल, जकर हाथमे पेट्रोल बम, हाथमे ईंधनसँ भरल प्लास्टिकक बोतल छल, ओहिमे आगि लगा फेकलक। ई सब बिना उकसावेक छल, कियो हुनका उकसयने नहिं छल। ताबति धरि टीम बलक प्रयोग सेहो शुरू नहिं कयने छल, बल्कि अतिक्रमण हटाबय केर कारवाईमे व्यस्त छल।