प्रधानमंत्री नरेन्द्र मोदी ‘वीर बाल दिवस’क अवसर पर आयोजित कार्यक्रममे भाग लेलनि। प्रधानमंत्री नरेन्द्र मोदी कहलनि, “आइ देश वीर साहिबजादाक अमर बलिदानकेँ स्मरण कऽ रहल अछि आ हुनकासँ प्रेरणा लऽ रहल अछि। स्वतन्त्रताक ‘अमृत काल’मे वीर बाल दिवसक रूपमे एकटा नव अध्यायक आरम्भ भेल अछि। पछिला साल २६ दिसम्बरकेँ देश पहिल बेर वीर बाल दिवसक रूपमे मनौलक, जखन पूरा देशक सभ गोटे साहिबजादाक वीरगाथा बड्ड भावुकतासँ सुनलनि। वीर बाल दिवस भारतीयताक रक्षाक लेल किछु करबाक संकल्पक प्रतीक अछि। ई दिन हमरा सभकेँ मोन पाड़ैत अछि जे शौर्यक पराकाष्ठाक समय कम आयु मायने नहिं रखैत अछि।”
मोदी आगू कहलनि “हमरा खुशी अछि जे वीर बाल दिवस आब अन्तर्राष्ट्रीय स्तर पर सेहो मनाओल जा रहल अछि। वीर बाल दिवसक कार्यक्रम ब्रिटेन, ऑस्ट्रेलिया, न्यूजीलैंड, संयुक्त अरब अमीरात आ ग्रीसमे सेहो आयोजित कयल जा रहल अछि। पूरा दुनिया भारतक वीर साहिबजादाक बारेमे बेसी जानत आ हुनकर महान कर्मसँ सीखत।”
पीएम मोदी कहलनि जे जाबैत धरि हम अपन विरासतक सम्मान नहिं कयलौंह, दुनिया सेहो हमर विरासतकेँ महत्व नहिं देलक। आइ जखन हमरा अपन विरासत पर गर्व अछि तखनि दुनियाक दृष्टिकोण सेहो बदलि गेल अछि।
“हमरा खुशी अछि जे आजुक भारत ‘गुलामीक मानसिकता’सँ बाहर आबि रहल अछि। आजुक भारतकेँ अपन जनता, अपन क्षमता, अपन प्रेरणापर पूरा विश्वास अछि। साहिबजादाक बलिदान आजुक भारतक लेल राष्ट्रीय प्रेरणाक विषय अछि। आजुक भारतमे गोविन्द गुरुक बलिदान, भगवान बिरसा मुण्डाक बलिदान सम्पूर्ण राष्ट्रकेँ प्रेरित करैत अछि।
आइ भारत दुनियाक सबसँ युवा राष्ट्रमेसँ एक अछि। भारतक स्वतन्त्रता सङ्ग्रामक समयमे सेहो एतेक युवा नहि छलाह। जखन ओ युवा शक्ति देशकेँ स्वतन्त्रता देलक, तखन आजुक युवा शक्ति भारतकेँ कोन ऊँचाइ पर लऽ जा सकैत अछि, ई कल्पनासँ बाहर अछि।
आबयवला २५ साल हमर युवाक लेल एकटा पैघ अवसर लऽ आबि रहल अछि। कोनो क्षेत्र, समाजमे जन्मल भारतक युवासभक असीम सपना सभ होइत अछि। एहि सपना केर पूरा करय केर लेल सरकार लग स्पष्ट रोड मैप अछि, स्पष्ट विजन अछि, स्पष्ट नीति अछि आ नीयतमे कोनो खोट नहिं अछि।”
