नीतीश कुमारक संग ठिक व्यवहार नहिं भेल – केन्द्रीय मंत्री नित्यानंद राय

पटना

*

आई.एन.डी.आई.ए. गठबंधनक चारिम बैसारक बाद मुख्यमंत्री नीतीश कुमार चर्चामे छथि। एहि बारेमे बहुत बयानबाजी भऽ रहल अछि। केंद्रीय मंत्री नित्यानंद राय शनिदिन मुख्यमंत्री नीतीश कुमार आ तेजस्वी यादव पर हमला केलथि। ओ कहला जे “भाजपा कार्यकर्ता सभक पार्टी अछि। पीएम मोदी जे संकल्प करैत छथि, ओ पूरा करैत छथि। भाजपा अपन नीति पर चलैत अछि। तेजस्वी यादवक पार्टी एकटा पारिवारिक पार्टी अछि। ‘इंडिया’ गठबंधनमे नीतीश कुमारक संग अनुचित व्यवहार कयल गेल। लालू यादव मुख्यमंत्री नीतीश कुमारकेँ सपना देखौलनि।”

आगा राय कहलनि “एहि सरकारक मंशामे खोट अछि। एहि सरकारमे अपराधीकेँ सुरक्षा भेटि रहल अछि। आम जनतासँ लऽ कऽ पुलिसकर्मी धरि एहन घटना भऽ रहल अछि, जहियासँ नीतीश कुमार आ तेजस्वी यादवक गठबंधन सरकार बनल अछि, कानून-व्यवस्था पूर्ण रूपसँ ध्वस्त भS गेल अछि। शराबक व्यवसायसँ जुड़ल सरकार द्वारा संरक्षण प्राप्त लोक, चाहे ओ पुलिसकर्मी होथि वा शराब माफिया, सेहो पूर्णतः अराजक स्थिति उत्पन्न कऽ देलक अछि। बिहारसँ बहुत पैघ पलायन भऽ रहल अछि।”

केंद्रीय मंत्री आगू कहलनि “जतय कांग्रेस वा विपक्षक सरकार अछि, ओतय तुष्टिकरणक नीति अछि आ एकर परिणाम देश पहिने भुगतने अछि। देश आब कष्ट नहिं उठाबए चाहैत अछि।” संगहि तेजस्वी-सीएम नीतीशक बैसार आ सीट बंटवाराक संबंधमे नित्यानंद राय कहलनि कि “सीट बंटवारा होइ वा नहिं, हुनकर विषय अछि। जे विषय एनडीए आ भाजपाक अछि, ओतय जनता प्रधानमंत्री नरेंद्र मोदीक नाम आ काजसँ एतेक खुश अछि जे एनडीए पिछला बेरसँ बेसी बहुमतसँ सरकार बनेबा लेल तैयार अछि। किनको फोन पर बात कय लेलासँ वा अयबा-जयबासँ कोनो फर्क नहिं पड़यवाला अछि।”