बिहार सरकार सेहो कोरोनाक खतराक प्रति सतर्क
पटना, दरभंगा आ गया हवाई अड्डा पर होयत रैंडम टेस्टिंग
*
पटना
*
बिहार सरकारक स्वास्थ्य विभाग कोरोनाक बढ़ैत गतिकेँ देखैत सभ अस्पतालकेँ सतर्क कऽ देलक अछि आ राज्यक हवाई अड्डापर निर्देश देलक अछि।
देशभरिमे कोरोनाक नव सब-वैरिएंट जेएन-1 केर मामिलामे बढ़ोत्तरीक बाद आब बिहार सरकार सेहो अलर्ट मोड पर अछि। राज्य सरकार सभ जिला आ अस्पतालमे कोविड-१९ आरटी-पीसीआर जाञ्च बढ़यबाक निर्देश देलक अछि। एकर संगहि पटना, दरभंगा आ गया हवाई अड्डा पर आबयवला यात्रीक रैंडम टेस्टक निर्देश सेहो देलक अछि। स्वास्थ्य विभाग द्वारा ई निर्देश जारी कयल गेल अछि।
स्वास्थ्य विभागक अपर मुख्य सचिव द्वारा शुक्रदिन जारी निर्देशक अनुसार अस्पताल आबयवला बोखार, खांसी आ श्वसन रोगक पीड़ित सभटा लोकक कोविडक जाँच कयल जायत। जिला मे आरटी-पीसीआर जांच बढ़ेबाक निर्देश देल गेल अछि।
अस्पतालसभकेँ ऑक्सीजन, आईसीयू बेड, दवाई आदिक उपलब्धता आ ओकर कार्यक्षमता सुनिश्चित करबाक लेल कहल गेल अछि। मास्क आ सेनिटाइजरक उपलब्धता पर सेहो जोर देल गेल अछि।
जनतब ई जे देशमे पछिला २४ घंटामे कोविड-१९ केर ७५२ नव मामिला दर्ज भेल अछि। सक्रिय मरीजक संख्या बढ़ि कऽ ३,४२० भऽ गेल अछि। २१ मई, २०२३क बाद देशमे एक दिनमे कोरोना वायरसक संक्रमणक ई सबसँ बेसी संख्या अछि। केंद्रीय स्वास्थ्य आ परिवार कल्याण मंत्रालयक आंकड़ाक अनुसार देशमे एखन धरि कोविड-१९ मामिलाक कुल संख्या ४.५० करोड़ अछि। देशमे पछिला २४ घंटामे संक्रमणसँ चारि गोटेक मृत्युक सङ्ग एहि महामारीसँ मृत्युक संख्या बढ़ि कऽ ५,३३,३३२ भऽ गेल अछि।
स्वास्थ्य मंत्रालयक आंकड़ाक अनुसार, पछिला २४ घंटामे केरलमे दूटा आ राजस्थान आ कर्नाटकमे एक-एक मरीजक मृत्यु भेल। स्वास्थ्य मंत्रालयक वेबसाइटक अनुसार, एहि बीमारीसँ ठीक होयवला लोकक संख्या बढ़ि कऽ ४,४४,७१,२१२ भऽ गेल अछि। राष्ट्रीय स्तर पर स्वस्थ होयबाक दर ९८.८१ प्रतिशत आ मृत्यु दर १.१९ प्रतिशत अछि। मंत्रालयक अनुसार देशमे एखनि तक कोविड-१९ रोधी टीकाकरण अभियानक अंतर्गत २२०.६७ करोड़ खुराक देल जा चुकल अछि।
