दुर्घटनाग्रस्त शराब लदल ट्रकसँ बोतल लूटबाक लेल उमड़ल भीड़
अररिया । समदिया
बिहारमे शराबबंदी लागू रहबाक बावजूद अररिया जिलामे विदेशी शराबसँ लदल एकटा ट्रक दुर्घटनाग्रस्त भऽ गेल। रानीगंज थाना क्षेत्रक खरहट लग टोल टैक्सक समीप ट्रक पलटिते आसपासक लोकक भीड़ जुटि गेल आ किछु लोक ट्रकसँ शराबक बोतल निकालि लऽ गेल। घटना केर फोटो आ वीडियो सोशल मीडियापर वायरल भऽ रहल अछि।
हादसाक बाद ट्रकक चालक आ खलासी घटनास्थलसँ फरार भऽ गेल। सूचना भेटलापर रानीगंज थाना पुलिस पहुँचि दुर्घटनाग्रस्त ट्रककेँ जब्त कऽ लेलक। अररियाक एसडीपीओ सुशील कुमारक अनुसार, शराब लूटबाक जानकारी भेटल अछि। वायरल फोटो आ वीडियो केर आधारपर लूटमे शामिल लोकक पहिचान कएल जा रहल अछि आ हुनका विरुद्ध कार्रवाई कएल जाएत।
पुलिस ईहो जाँचि रहल अछि जे शराबसँ लदल ट्रक कतयसँ आबि रहल छल आ ओकर गन्तव्य कतऽ छल। शराबबंदी लागू रहबाक बीच शराबक एहेन परिवहन आ दुर्घटनाक बाद बोतल लूटबाक घटना पर सवाल उठल अछि।
