एक संग आबि रहल २८ सितम्बरकेँ तीनटा तुफान, १५ राज्यमे IMD अलर्ट

पटना । समदिया

देशमे एक्के समय तीनटा मौसमी सिस्टम सक्रिय भेलासँ उत्तर भारतसँ पूर्वोत्तर धरि मौसम प्रभावित हेबाक संभावना अछि। उत्तर प्रदेशक मध्य भागमे कम दबावक क्षेत्र, बंगालक खाड़ी लग चक्रवाती परिसंचरण आ उत्तर भारतमे पश्चिमी विक्षोभक सक्रियताक असरिसँ कतेको ठाम भारी वर्षा, गरज-चमक आ तेज बसातक स्थिति बनि सकैत अछि। मौसम विभागक चेतौनीक अनुसार यूपी, बिहार, उत्तराखंड, हिमाचल प्रदेश आ पश्चिम बंगाल समेत कतेको राज्य प्रभावित भऽ सकैत अछि।

दिल्ली-एनसीआर आ हरियाणा

२८ सितम्बरकेँ दिल्ली, गुरुग्राम, फरीदाबाद आ नोएडामे बादल छाओल रहबाक संग किछु ठाम हल्का वर्षा भऽ सकैत अछि। तापमानमे विशेष गिरावट नहि, मुदा हवाक कारण मौसम अपेक्षाकृत सुहावन रहबाक संभावना अछि।

बिहारमे वज्रपातक चेतौनी

पटना, मुजफ्फरपुर, भागलपुर, पूर्णिया समेत कतेको जिलामे गरज-चमकक संग तेज बौछार पड़बाक संभावना अछि। किछु ठाम वज्रपात सेहो भऽ सकैत अछि। पटनामे अधिकतम तापमान करीब ३१ डिग्री आ न्यूनतम २४ डिग्री सेल्सियस रहबाक अनुमान अछि।

झारखंडमे आंधी-वर्षा

रांची, जमशेदपुर, धनबाद आ बोकारो समेत कतेको इलाकामे बादल आ रौदक बीच तेज हवा संग हल्कासँ मध्यम वर्षा भऽ सकैत अछि। रांचीमे तापमान करीब २८ डिग्री अधिकतम आ २१ डिग्री न्यूनतम रहबाक संभावना अछि।

पश्चिम बंगालमे भारी वर्षाक आशंका

कोलकाता, दार्जिलिंग, हावड़ा आ जलपाईगुड़ीमे तेज हवा संग भारी वर्षाक संभावना अछि। नीचला इलाकामे जलजमावक स्थिति बनि सकैत अछि। कोलकातामे अधिकतम तापमान करीब ३३ डिग्री आ न्यूनतम २६ डिग्री सेल्सियस रहबाक अनुमान अछि।