ईरानक अमेरिकाकेँ चेतौनी, फेर हमला भेल तँ हिंद महासागर धरि पसरत युद्ध

नई दिल्ली । समदिया

ईरानक सर्वोच्च नेता मोजतबा खामेनेईक सलाहकार याह्या रहीम सफवी बृहस्पतिकेँ चेतौनी देलनि जे अमेरिका फेर हमला करैत अछि तँ युद्धक दायरा हिंद महासागर धरि पसरि सकैत अछि। ईरानी समाचार एजेंसी फार्स द्वारा जारी वीडियोमे सफवी कहलनि जे संघर्ष पहिनहि फारसक खाड़ी आ होर्मुज जलडमरूमध्यसँ आगाँ बढ़ि लाल सागर धरि पहुँचि गेल अछि। आब युद्ध बढ़ल तँ एकर मोर्चा हिंद महासागर आ संभवतः ओकरो आगाँ धरि जा सकैत अछि।

डिएगो गार्सियाकेँ लऽ कऽ बढ़ल चिंता

सफवीक बयान महत्वपूर्ण मानल जा रहल अछि, कारण हिंद महासागरमे अमेरिका-ब्रिटेनक रणनीतिक सैन्य अड्डा डिएगो गार्सिया स्थित अछि, जे ईरानसँ करीब 4,000 किलोमीटर दूर अछि। ईरानी अधिकारी पहिने सेहो अमेरिकी हमला फेर शुरू भेलाक स्थितिमे संघर्षक भौगोलिक दायरा बढ़ेबाक चेतौनी दऽ चुकल छथि।

लाल सागर आ बाब-अल-मंदेब पर नजरि

यमनमे सऊदी समर्थित सरकारी बलक संग संघर्षरत हूती हालमे लाल सागरक तटीय क्षेत्रमे अपन नियंत्रण बढ़ौलक अछि। एहिसँ रणनीतिक बाब-अल-मंदेब जलडमरूमध्य पर ओकर पकड़ मजबूत भेल अछि। ई जलमार्ग एशियाकेँ स्वेज नहरक माध्यमसँ यूरोपसँ जोड़ैत अछि। ईरान हूतीकेँ सैन्य सहयोग देबाक आरोपक सामना करैत रहल अछि, मुदा यमनक संघर्षमे प्रत्यक्ष रूपसँ शामिल होएबाक बातसँ इनकार करैत अछि।

होर्मुज जलडमरूमध्य पर टकराव

ईरान अमेरिकी-इस्राइली हमलाक जवाबमे अपन तट लग स्थित होर्मुज जलडमरूमध्यकेँ बंद कऽ देलक अछि। युद्धसँ पहिने वैश्विक तेल आ गैसक एकटा महत्वपूर्ण हिस्सा एहि मार्गसँ गुजरैत छल। आब अमेरिका आ ईरानक बीच एहि रणनीतिक जलमार्ग पर नियंत्रण केर लऽ कऽ तनाव बढ़ल अछि। ईरान संकेत देलक अछि जे अमेरिका फेर हमला करैत अछि तँ संघर्षक दायरा आरो बढ़ि सकैत अछि।