मदरसा बन्न करबाक मुद्दा पर ओवैसीक बंगाल सरकार पर हमला

पटना । समदिया

पश्चिम बंगालमे 252 गैर-मान्यताप्राप्त मदरसाकेँ बंद करबाक सरकारी आदेशक बाद राजनीतिक बयानबाजी तेज भऽ गेल अछि। AIMIM प्रमुख असदुद्दीन ओवैसी बंगाल सरकार पर मुसलमान आ इस्लामक प्रति नफरतक कारण मदरसा बंद करबाक आरोप लगौलनि।

ओवैसी कहलनि जे मदरसामे मुसलमान बच्चासभकेँ कुरानक शिक्षा भेटैत अछि, ताहि कारणेँ सरकार एकरा बंद करबाक आदेश देलक अछि। हुनकर अनुसार ई संविधानक अनुच्छेद 30 केर उल्लंघन अछि। अल्पसंख्यक समुदायकेँ अपन पसिनक शैक्षणिक संस्थान स्थापित आ संचालित करबाक अधिकार संविधान देैत अछि।

UCC पर सेहो केंद्र पर निशाना

ओवैसी समान नागरिक संहिता (UCC) केँ लऽ कऽ सेहो भाजपा आ केंद्र सरकार पर निशाना साधलनि। हुनकर आरोप अछि जे UCC समानताक उद्देश्यसँ नहि, बल्कि मुसलमानसभकेँ निशाना बनयबाक उद्देश्यसँ लागू करबाक प्रयास भऽ रहल अछि।

ओवैसी भाजपा, अमित शाह आ RSS पर गैर-हिंदूसभ पर हिंदू कानून थोपबाक प्रयासक आरोप लगाबैत कहलनि जे UCC सँ संविधानक अनुच्छेद 14, 25, 26 आ 29 प्रभावित होइत अछि। ओ ‘अशांत क्षेत्र अधिनियम’ आ ‘लव जिहाद’ संबंधी कानूनक औचित्य पर सेहो सवाल उठौलनि।