कर्नाटकमे बिहारी मजदूरक पिटाइ, इलाज लेल बिहार अनबाक क्रममे मौत

अनंतपुरमु । समदिया

कर्नाटकक अनंतपुरमु जिलामे गोपालगंजक एकटा मजदूरसँ स्थानीय लोक सभ कथित रूपसँ बेरहमीसँ मारिपीट कयलक, जाहिमे ओ गंभीर रूपसँ घायल भऽ गेल। इलाज लेल बिहार अनबाक क्रममे बाटेमे हुनकर मृत्यु भऽ गेल। मृतकक पहिचान गोपालगंजक मटिहनिया गाम निवासी 35 वर्षीय चाँद मोहम्मदक रूपमे भेल अछि। परिजनक आरोप अछि जे हुनका ‘बिहारी’ कहि कऽ निशाना बनाओल गेल।

परिजनक अनुसार चाँद मोहम्मद वेल्डिंग मिस्त्री छलाह आ करीब तीन वर्षसँ पुणेमे रहि कऽ मजदूरी करैत छलाह। किछु दिन पहिने ठेकेदारक माध्यमसँ कर्नाटकक अनंतपुरमु जिलाक येर्रागुंटा गेट क्षेत्रमे वेल्डिंगक काज लेल गेल छलाह।

8 सितंबरक राति भेल छल विवाद

परिजनक कहब अछि जे 8 सितंबरक राति किछु बातकेँ लऽ कऽ चाँदक स्थानीय लोकसँ विवाद भऽ गेल। विवाद बढ़लाक बाद किछु लोक हुनका संग मारपीट शुरू कऽ देलक। आरोप अछि जे एहि दौरान हुनका ‘बिहारी’ कहि कऽ प्रताड़ित सेहो कएल गेल। मारिपीटमे चाँद गंभीर रूपसँ घायल भऽ बेहोश भऽ गेल छलाह।

अस्पतालमे इलाजक बाद बिहार अनबाक प्रयास

दोसर दिन पुलिसक नजरि बेहोशीक अवस्थामे पड़ल चाँद पर पड़ल। पुलिस एम्बुलेंसक मददिसँ हुनका बल्लारीक वीआईएमएस अस्पतालमे भर्ती करौलक। सूचना भेटलाक बाद परिजन कर्नाटक पहुँचला। हालत गंभीर देखैत बेहतर इलाजक आशामे हुनका बिहार अनबाक निर्णय लेल गेल, मुदा बिहार पहुँचबाक पहिनहि बाटेमे हुनकर हालत बिगड़ि गेल आ मृत्यु भऽ गेल।

*परिजन प्राथमिकी दर्ज करौलनि”

मृत्युक बाद परिजन आरोपित लोकक विरुद्ध प्राथमिकी दर्ज करौलनि। हुनकर आरोप अछि जे विवादक बाद चाँदक बेरहमीसँ पिटाइ कएल गेल आ पहिचानक आधार पर ‘बिहारी’ कहि कऽ निशाना बनाओल गेल। कर्नाटक पुलिस मामिलाक जाँचमे जुटल अछि। पुलिस घटनाक कारण आ मारिपीटमे शामिल लोकक भूमिकाक पड़ताल कऽ रहल अछि। वास्तविक कारण आ आरोपक पुष्टि जाँच पूरा भेलाक बादे भऽ सकत।

पत्नी आ पाँच संतानकेँ छोड़ि गेलाह

चाँद मोहम्मदक मृत्युक खबरि गाम पहुँचिते परिवारमे मातम पसरि गेल। ओ अपन पाछाँ पत्नी, चारि बेटी आ एक बेटा छोड़ि गेलाह। परिजन हुनकर परिवारक लेल उचित मुआवजा आ आरोपितक विरुद्ध सख्त कार्रवाईक मांग कएने छथि। हुनकर कहब अछि जे चाँद परिवारक रोजी-रोटीक मुख्य सहारा छलाह।