जँ पीएम आ गृहमंत्रीसँ पर्दाक पाछाँ तेजस्वी भेट करैत छथि तँ बिहारक बाढ़ि आदि पर सेहो करथि बात : पीके

पटना । समदिया

जन सुराज पार्टीक प्रमुख प्रशांत किशोर बिहारक बाढ़ि आ राहतक मुद्दा पर नेता प्रतिपक्ष तेजस्वी यादव पर निशाना साधलनि। ओ कहलनि जे जँ तेजस्वी यादव अपन सुरक्षाक मुद्दा पर प्रधानमंत्री नरेंद्र मोदी आ केंद्रीय गृहमंत्री अमित शाहसँ पर्दाक पाछाँ भेंट कऽ सकैत छथि, तँ बिहारक विकास आ बाढ़ि राहतक लेल सेहो हुनका सभसँ भेटि कऽ बात करबाक चाही।

पत्रकारक प्रश्नक उत्तर दैत प्रशांत किशोर कहलनि जे विधानसभामे विपक्षी नेता हेबाक नातासँ तेजस्वीक प्रधानमंत्रीसँ भेंट कऽ बिहारक समस्या रखबाक चाही। हुनकर एहि बयान पर राजनीतिक चर्चा तेज भऽ गेल अछि। एहि मुद्दा पर एखनि धरि तेजस्वी यादवक कोनो प्रतिक्रिया नहि आयल अछि।

बाढ़ि राहत पर तेजस्वीक आरोप

बिहारमे बाढ़िक स्थिति पर तेजस्वी यादव केंद्र आ राज्य सरकार पर पर्याप्त सहायता नहि देबाक आरोप लगौने छथि। हुनकर दावा अछि जे बाढ़िसँ करीब 45 लाख लोक प्रभावित भेल छथि आ 50 सँ बेसी लोकक मृत्यु भेल अछि। हुनका अनुसार बाढ़सँ हजारों करोड़ टाकाक क्षति भेल अछि।

तेजस्वी यादव प्रधानमंत्री नरेंद्र मोदी आ गृहमंत्री अमित शाहसँ बिहार लेल तत्काल 5 हजार करोड़ टाकाक सहायता आ विशेष पैकेजक मांग कएने छथि। हुनकर कहब अछि जे एखनि धरि एहि मांग पर केंद्र दिसिसँ कोनो संतोषजनक जवाब नहि भेटल अछि।