कांग्रेस पार्टीक कहब अछि जे आयकर विभाग हुनका पर २१० करोड़ टाकाक जुर्माना लगा देलक अछि। कांग्रेसक २८५ करोड़ टाका केर बैंक खाता जब्त कएल गेल अछि। कांग्रेस अध्यक्ष मल्लिकार्जुन खड़गे, कांग्रेस संसदीय दलक अध्यक्ष सोनिया गाँधी आ राहुल गाँधी बृहस्पतिकेँ एहि पर अपन आपत्ति दर्ज कयलनि। खड़गे कहलनि जे कांग्रेसकेँ असहाय बना केंद्र सरकार स्वतंत्र आ निष्पक्ष चुनावक बात करैत अछि। ई भए नहिं सकैत अछि।
सोनिया गाँधी कहलनि जे कांग्रेस द्वारा जनतासँ एकत्र कयल गेल धनराशि रोकि देल गेल अछि। एहि चुनौतीपूर्ण परिस्थितिमे सेहो हम प्रभावी रूपसँ चुनाव प्रचारक प्रयास कऽ रहल छी। कांग्रेसक कोष पर जानिबूझ कऽ अलोकतांत्रिक तरीकासँ हमला कयल जा रहल अछि।
सोनिया गांधी कहलनि जे ई लोकतंत्र पर हमला अछि। जँ कांग्रेस कोनो तरहें चुनाव प्रचारमे खर्च नहिं कऽ सकैत अछि तखन चुनाव कोन बातक ? पिछला एक महीनासँ हम अपन २८५ करोड़ टाकाक उपयोग नहिं कए पाबि रहल छी।
कांग्रेसक कोषाध्यक्ष अजय माकन कहलनि जे कांग्रेस पार्टीक लग अपन प्रचार पर खर्च करबाक लेल धन नहिं अछि। खाता जब्त भेलाक कारण ओ चुनाव लड़बाक लेल उम्मीदवारसभकेँ धन नहिं दऽ पाबि रहल छथि। हमरा विज्ञापन स्लॉट बुक करए पड़त। अखबारमे, सोशल मीडिया पर विज्ञापन देबाक अछि, मुदा हम सभ ओ नहिं कऽ पाबि रहल छी।
माकन कहलनि जे सात साल पहिने मोतीलाल बोरा आ १९९४-९५ मे सीताराम केसरीक युगक नोटिस सेहो हमरा पठाओल गेल अछि। जँ सरकार एहि तरहेँ काज करैत अछि तखन महात्मा गाँधीक युगक नोटिस सेहो आब कांग्रेसकेँ पठाओल जा सकैत अछि।
माकन कहलनि “हम अपन खाता मात्र ३० दिन देरीसँ जमा केलहुं। कानूनक अनुसार एकरा लेल मात्र १०,००० टाका लगाओल जा सकैत अछि। मुदा हमरा सभ पर २१० करोड़ टाकाक जुर्माना लगाओल गेल। हमर बैंक खातासँ ११५ करोड़ टाका जबरदस्ती लऽ लेल गेल।
राहुल गांधी कहलनि जे हमर सभ बैंक खाता पर रोक लगा देल गेल अछि। चुनावक समय देशक सबसँ पैघ विपक्षी दलक खाता पर रोक लगा देल गेल अछि। ओ एकरा आपराधिक गतिविधि कहलखिन। राहुल गांधी कहलखिन जे हम चुनाव प्रचार पर पैसा खर्च नहिं कऽ पाबि रहल छी। हमर नेता यात्रा नहिं कए पाबि रहल छथि। हमरा लग रेल यात्राक लेल सेहो पैसा नहिं अछि, हवाई जहाज केर तऽ छोड़ू। देशक २० प्रतिशत लोक हमरा वोट देलक मुदा हम कोनो चीज पर २ टाका सेहो खर्च नहिं कए पाबि रहल छी। आगा राहुल गांधी कहलनि कि एक महीना पहिने कांग्रेस पार्टीक सब बैंक खाता पर रोक लगा देल गेल। आश्चर्यजनक बात ई अछि जे कोनो अदालत या चुनाव आयोग एहि पर किछु नहिं कहलक। आइ स्थिति ई अछि जे हम अपन नेताकेँ एक शहरसँ दोसर शहरमे नहिं पठा सकैत छी। आयकर अधिनियममे स्पष्ट रूपसँ कहल गेल अछि जे अधिकतम १०,००० रुपैयाक जुर्माना लगाओल जा सकैत अछि, मुदा कांग्रेस पार्टीक विरुद्ध आपराधिक कार्रवाई कयल गेल अछि। ओ संवैधानिक निकायसभसँ एकर विरुद्ध किछु करबाक अपील कयलनि।
