ब्रिक्स शिखर सम्मेलनमे भारतक कूटनीतिक प्रभाव स्पष्ट, 20 प्रमुख बात संक्षेपमे
नई दिल्ली । समदिया
भारतक अध्यक्षतामे आयोजित 18म ब्रिक्स शिखर सम्मेलनमे वैश्विक राजनीति, आतंकवाद, पश्चिम एशिया संकट, व्यापार, ‘ग्लोबल साउथ’ आ वैश्विक संस्थामे सुधार पर महत्वपूर्ण चर्चा भेल। सम्मेलनक समापन पर ‘नई दिल्ली घोषणापत्र’ जारी भेल, जाहि पर सदस्य देशसभक सहमति रहल।
एक मंच पर ईरान, यूएई आ सऊदी अरब
पश्चिम एशियामे तनावक बीच भारत तीनू देशकेँ एक मंच पर अनबाक कूटनीतिक सफलता हासिल केलक। सदस्य देशसभ हिंसा पर चिंता व्यक्त करैत बातचीत आ संयमक पक्षमे रहल।
आतंकवाद पर सख्त रुख
ब्रिक्स देशसभ आतंकवादक सभ रूप, आतंकी वित्तपोषण आ सुरक्षित पनाहगाहक विरोधमे साझा रुख व्यक्त केलक। घोषणापत्रमे पहलगाम आतंकी हमलाक निंदा सेहो प्रमुखतासँ शामिल भेल।
टैरिफ आ एकतरफा प्रतिबंधक विरोध
घोषणापत्रमे एकतरफा व्यापारिक एवं गैर-व्यापारिक प्रतिबंध आ आर्थिक दबाव पर आपत्ति जताओल गेल। अमेरिका द्वारा लागू टैरिफक सेहो विरोध भेल।
मोदी-शी जिनपिंग आ मोदी-पुतिन भेट
प्रधानमंत्री नरेंद्र मोदी चीनी राष्ट्रपति शी जिनपिंगसँ सीमा पर शांति, व्यापार आ द्विपक्षीय संबंध पर चर्चा केलनि। रूसक राष्ट्रपति व्लादिमीर पुतिनसँ यूक्रेन संकट, व्यापार आ रणनीतिक सहयोग पर विचार-विमर्श भेल। मोदी-पुतिनक संग कार यात्राक सेहो कूटनीतिक रूपसँ चर्चा भेल।
‘ग्लोबल साउथ’ आ संयुक्त राष्ट्र सुधार
भारत विकासशील देशसभक वैश्विक निर्णय-प्रक्रियामे बेसी भागीदारीक मांग दोहरौलक आ संयुक्त राष्ट्र सुरक्षा परिषदमे स्थायी सदस्यताक अपन दावेदारी राखलक।
डॉलर पर निर्भरता घटेबाक पहल
ब्रिक्स देशसभ स्थानीय मुद्रामे सीमा-पार भुगतान आ वैकल्पिक वित्तीय प्रणालीकेँ बढ़ावा देबाक पक्षमे रहल, जाहिसँ डॉलर पर निर्भरता कम करबाक दिशा मजबूत भेल।
AI सँ डिजिटल खेती धरि सहयोग
कृत्रिम बुद्धिमत्ता, नब प्रौद्योगिकी, ऊर्जा, जलवायु, खाद्य सुरक्षा, MSME, डिजिटल खेती, स्वास्थ्य, आधारभूत संरचना आ युवाक कौशल विकास पर सहयोग बढ़ेबाक सहमति बनल।
2027 मे चीनमे अगिला शिखर सम्मेलन
भारतक अध्यक्षताक बाद 2027 मे चीन ब्रिक्स शिखर सम्मेलनक मेजबानी करत।
प्रधानमंत्री मोदी समापन पर कहलनि जे ब्रिक्स केवल देशसभक समूह नहि, बल्कि समाधानक समूह अछि। सम्मेलन भारतक कूटनीतिक प्रभाव, ‘ग्लोबल साउथ’क नेतृत्व आ वैश्विक मुद्दासभ पर ओकर सक्रिय भूमिकाकेँ मजबूत करबाक अवसर बनल।
