‘बुझल-सूझल किछु नहिं, जे मोनमे आयल बकि देलौंह, पहिने पढ़ू फेर बाजू’ : स्वरा भास्करकेँ मैथिली ठाकुरक दू-टूक

रायपुर । समदिया

फिल्म अभिनेत्री स्वरा भास्करक ‘जौहर’ संबंधी टिप्पणी पर भाजपा विधायक मैथिली ठाकुर ठोक्कल प्रतिक्रिया देलनि। शुक्रकेँ रायपुरमे मीडियासँ बातचीत करैत मैथिली ठाकुर कहलनि जे स्वरा भास्करकेँ एहि विषयमे बाजबासँ पहिने पूरा जानकारी आ अध्ययन करबाक चाही।

मैथिली ठाकुर कहलनि, “ई बहुत भद्दा बात छल। ओ जतेक आत्मविश्वासक संग उल्टा-पुल्टा बात कहलनि, से बहुत बेकार बात छल। हमरा लगैत अछि जे हुनका एहि सभ विषयमे बुझबाक समझ नहि अछि तँ नहि बाजबाक चाही। अथवा पूरा पढ़ाइ कऽ तकर बाद बाजथि। बुझल-सूझल किछु नहिं, जे मोनमे आयल बकि देलौंह।”

जीतेंद्र मिश्राक नियुक्ति पर देलनि बधाई

श्रीराम जन्मभूमि तीर्थ क्षेत्र ट्रस्टक पहिल मुख्य कार्यपालक अधिकारी (CEO) केर रूपमे एयर मार्शल (सेवानिवृत्त) जीतेंद्र मिश्राक नियुक्ति पर मैथिली ठाकुर हुनका बधाई देलनि। ओ कहलनि जे हुनका सभ देशवासी दिसिसँ बहुत-बहुत बधाई।

स्वरा भास्करक टिप्पणी पर विवाद

स्वरा भास्कर फिल्म ‘पद्मावत’मे जौहरक चित्रणक आलोचना करैत फिल्मक अंतिम दृश्यसँ भेटैत संदेश पर सवाल उठौलक अछि। एकटा कार्यक्रममे ओ बाजल जे जँ कोनो महिला दुष्कर्मक पीड़िता होए तँ फिल्मक ई दृश्य ओकरा की संदेश दैत अछि। ओकर कहब छल जे की दुष्कर्म कोनो महिलाक जीवनक अंत मानल जाय ? ओ एहि दृश्यकेँ आपत्तिजनक बतौलक अछि।

स्वरा भास्करक एहि टिप्पणी पर भाजपा नेता गौरव भाटिया सहित कतेको नेता पहिनेसँ प्रतिक्रिया दऽ चुकल छथि। पटनामे भाजपा नेतासभ स्वरा भास्करक पोस्टर पर कालिख पोतने छलाह। एहि मामिलामे पटना कोतवाली थानामे शिकायत सेहो दर्ज कराओल गेल अछि।