बीपीएससी TRE-4.0 शिक्षक भर्ती आवेदन प्रक्रिया स्थगित, 32,388 पदक लेल अभ्यर्थीकेँ करय पड़त आर प्रतीक्षा

पटना । समदिया

बिहारमे शिक्षक भर्ती परीक्षा BPSC TRE-4.0 केर तैयारी कऽ रहल अभ्यर्थीकेँ एखनि किछु दिन आओर प्रतीक्षा करय पड़त। बिहार लोक सेवा आयोग (BPSC) द्वारा शिक्षक भर्ती लेल ऑनलाइन आवेदन प्रक्रिया 1 सितंबर 2026 सँ शुरू होबाक छल, मुदा एकरा स्थगित कऽ देल गेल अछि।

BPSC द्वारा जारी सूचना अनुसार, विज्ञापन संख्या 14/2026 केर अंतर्गत शिक्षा विभाग, बिहारमे विद्यालय अध्यापकक 32,388 रिक्त पद पर नियुक्ति लेल ऑनलाइन आवेदनक प्रक्रिया प्रक्रियात्मक बदलावक कारण स्थगित कएल गेल अछि। आयोग कहलक अछि जे एहि भर्तीसँ संबंधित नव तिथिक घोषणा शीघ्र कएल जाएत।

भर्ती रद्द नहि, केवल आवेदनक तारीख टलल

अभ्यर्थी सभक लेल राहतक बात ई अछि जे भर्ती प्रक्रिया रद्द नहि भेल अछि। मात्र ऑनलाइन आवेदन शुरू करबाक निर्धारित तारीख आगाँ बढ़ाओल गेल अछि। पहिने जारी विज्ञापन अनुसार 1 सितंबरसँ 30 सितंबर 2026 धरि आवेदन लेल जाएबाक छल। आब नव तारीखक घोषणा BPSC द्वारा बादमे कएल जाएत।

BPSC अपन अधिसूचनामे कहलक अछि जे TRE-4.0 केर तहत शिक्षा विभागमे विद्यालय अध्यापकक कुल 32,388 पद पर नियुक्ति लेल 1 सितंबरसँ प्रस्तावित ऑनलाइन आवेदन प्रक्रिया प्रक्रियात्मक बदलावक कारण स्थगित कएल गेल अछि।

कोन वर्गमे कतेक पद ?

कक्षा 1 सँ 5 धरि शिक्षक – 3,847 पद

कक्षा 6 सँ 8 धरि शिक्षक – 8,563 पद

कक्षा 9 सँ 10 धरि शिक्षक – 3,877 पद

कक्षा 11 सँ 12 धरि शिक्षक – 16,101 पद

शिक्षक सभकेँ कतेक भेटत वेतन ?

कक्षा 1 सँ 5: प्रारंभिक वेतन ₹25,000 प्रतिमाह, संगमे राज्य सरकार द्वारा निर्धारित अन्य भत्ता

कक्षा 6 सँ 8: प्रारंभिक वेतन ₹28,000 प्रतिमाह, संगमे अन्य देय भत्ता

कक्षा 9 सँ 10: मूल वेतन ₹31,000 प्रतिमाह, संगमे अन्य देय भत्ता

कक्षा 11 सँ 12: मूल वेतन ₹32,000 प्रतिमाह, संगमे अन्य देय भत्ता

BPSC अधिकारी पर सेहो भेल कार्रवाई

एहि बीच बिहारमे छात्र सभक प्रदर्शनक संबंधमे विवादित बयान देनिहार एकटा BPSC अधिकारी पर सेहो कार्रवाईक मामला सामने आएल अछि। मुख्यमंत्री सम्राट चौधरी अधिकारीकेँ निलंबित करबाक निर्देश देने छलाह।