धरना स्थल पर पहुंचि तेजस्वीक शिक्षामंत्री पर आक्रमण, कहलनि गलतीसँ बनि गेलाह शिक्षामंत्री मिथिलेश तिवारी
पटना । समदिया
बिहारक पूर्व उपमुख्यमंत्री आ नेता प्रतिपक्ष तेजस्वी यादव शुक्रदिन पटना स्थित गर्दनीबाग धरना स्थल पहुँचि 70म BPSC परीक्षा रद्द करबाक मांग करैत अभ्यर्थीसँ भेट कएलनि। ओ अभ्यर्थी सभक मांगक समर्थन करैत कहलनि जे BPSC परीक्षा पूर्ण पारदर्शिताक संग होएबाक चाही आ छात्र सभक भविष्यक संग खेलवाड़ नहि हेबाक चाही।
गर्दनीबागमे 70म BPSC परीक्षामे कथित गड़बड़ीक विरोधमे अभ्यर्थी धरना दऽ रहल छथि। हुनकर सभक मांग अछि जे परीक्षा रद्द कऽ फेरसँ पारदर्शी तरीकासँ परीक्षा आयोजित कएल जाए। तेजस्वी यादव अभ्यर्थी सभसँ भेट कऽ हुनकर सभक आंदोलनक समर्थन कएलनि। एहि क्रममे ओ TRE-4 अभ्यर्थी सभसँ सेहो भेट कएलनि।
‘पारदर्शिताक संग होय BPSC परीक्षा’
अभ्यर्थी सभसँ भेटक बाद तेजस्वी यादव कहलनि जे BPSC परीक्षा पूर्ण पारदर्शिताक संग कराओल जाए। हुनक कहब छलनि जे ने पेपर लीक हेबाक चाही आ ने कोनो प्रकारक धांधली। तेजस्वी यादव आरोप लगौलनि जे छात्र सभक भविष्यक संग खेलवाड़ भऽ रहल अछि आ बिहार लगातार बेरोजगारीक केंद्र बनैत जा रहल अछि।
ओ कहलनि, “छात्र सभक आंदोलनक हमर पूरा समर्थन अछि। जँ छात्र सभक संग फेर सड़क पर उतरबाक जरूरत पड़त तँ हम जरूर उतरब।”
शिक्षा ऋण योजना पर सेहो सरकार पर निशाना
तेजस्वी यादव शिक्षा ऋणक मुद्दा पर सेहो सरकार पर निशाना साधलनि। ओ कहलनि जे हुनकर सरकारक समय सात निश्चय योजनाक अंतर्गत 4 लाख रुपयाक सहायता योजना शुरू कएल गेल छल। मुदा, आब एहि योजनामे 2 लाख रुपया कम कऽ देल गेल अछि।
हुनक कहब छलनि जे बेरोजगारी आ प्रतियोगिता परीक्षा सभमे लगातार देरीक कारण छात्र सभक उमेर निकलि रहल अछि। जँ अभ्यर्थी सभक उमेर सीमा पार भऽ जाएत, तँ ओ सभ की करत आ अपन परिवारक भरण-पोषण केना करत, एहि बात पर सेहो तेजस्वी सवाल उठौलनि।
शिक्षा मंत्री मिथिलेश तिवारी पर तीक्ष्ण हमला
TRE-4 अभ्यर्थी सभसँ भेटक दौरान तेजस्वी यादव शिक्षा मंत्री मिथिलेश तिवारी पर तीक्ष्ण हमला कएलनि। ओ कहलनि, “शिक्षा मंत्री बाई मिस्टेक मंत्री बनि गेल छथि।”
तेजस्वी यादव आगू कहलनि जे शिक्षा मंत्री कान खोलि कऽ सुनि लिअ, छात्र सभ जे कहत, सेहे करय पड़त।
TRE-4 अभ्यर्थी सभक मुख्य मांग
गर्दनीबागमे धरना पर बैसल TRE-4 अभ्यर्थी सभ एकल परीक्षा आयोजित करबाक मांग कऽ रहल छथि। संगहि प्रदर्शनकारी सभ शिक्षा मंत्रीक इस्तीफाक मांग सेहो उठा रहल छथि।
तेजस्वी यादव दुनू समूहक अभ्यर्थीसँ भेट कऽ हुनका सभक मांगक समर्थन कएलनि। ओ कहलनि जे छात्र सभक हित आ भविष्यसँ जुड़ल मुद्दा पर जरूरत पड़ला पर ओ छात्र सभक संग सड़क पर उतरबासँ सेहो पाछाँ नहि हटताह।
