लोकसभा चुनावक तारीखक घोषणा कऽ देल गेल अछि। देश भरिमे चुनावक पारा चरम पर अछि, आरोपक दौर सेहो चलि रहल अछि। प्रत्येक दल, प्रत्येक नेता अपन विरोधीकेँ अपमानित तक करबामे कोनो कसर नहिं छोड़ि रहल अछि। ताजा बयान बिहारक उपमुख्यमंत्री सम्राट चौधरी द्वारा देल गेल अछि। बिहारक पूर्व मुख्यमंत्री लालू प्रसाद यादव पर तीक्ष्ण हमला कयलनि अछि। सम्राट चौधरी कहलनि अछि जे लालू यादव पहिने अपन बेटीसँ किडनी लेलनि, फेर टिकट देलनि।
दरअसल लालू प्रसाद यादवक बेटी रोहिणी आचार्य सारण लोकसभा सीटसँ अपन राजनीतिक पारीक शुरुआत कऽ सकैत छथि। ई उहे रोहिणी आचार्य छथि जे लालू यादवक बीमार पड़ला पर अपन पिताकेँ किडनी दान कयने छलीह। सारण लोकसभा चुनाव लड़बाक चर्चा पर सम्राट चौधरी कहलनि, ” टीकट बेचयमे लालू यादव अपन बेटी (रोहिणी आचार्य) तककेँ नहिं छोड़लनि, पहिने अपन बेटीसँ किडनी लेलनि आ फेर हुनका लोकसभा चुनावक टिकट देलनि।
सम्राट चौधरी एतहि नहिं रुकलाह, पहिने ओ मीडियाक सामने कहलनि जे लालू यादव टिकट बेचबामे माहिर छथि। एकर बाद ओ सोशल मीडिया पर अपन बयानक वीडियो शेयर करैत लिखलनि, “लालूजी टिकट बेचबामे माहिर खेलाड़ी छथि। टिकट बेचबाक मामिलामे ओ अपन बेटीकेँ सेहो नहिं छोड़लनि, पहिने हुनकासँ किडनी लऽ लेलनि आ फेर टिकट देलनि।”
सम्राट चौधरीक एहि बयानक बाद लालू समर्थक भड़कि गेल छथि। हुनक टिप्पणीकेँ निम्न स्तरक राजनीतिक रूपमे वर्णित कयल जा रहल अछि। अपन बयानक ट्वीट पर राजीव रंजन नामक एक्स यूजर लिखलनि, “मुंसी उप मुख्यमंत्रीकेँ एहिना लागत, एखन तक हुनकर पिता कुशवाहा समाजक वोट बेचैत छलाह, आब ई बेचि रहल छथि। सुनलौंह अछि जे एकटा धनी यादव नेताजीकेँ कुशवाहा नेत्री, जे अहाँक पिताकेँ सेहो पराजित कय सांसद बनल छलथि, हुनक टिकट कटबा टिकट दियाबय केर ठेका लेलनि अछि, किछु एडवांस सेहो भेटल अछि, की ई सच अछि ?”
