पेपर लीक, शिक्षा आ परिसीमनक मुद्दापर कांग्रेसक बैठकमे गंभीर चर्चा

नई दिल्ली । समदिया

कांग्रेसक ऑफ-ब्रीफिंगमे बृहस्पतिदिन अनेक महत्वपूर्ण मुद्दापर विस्तृत चर्चा भेल। कांग्रेसक संचार प्रभारी महासचिव जयराम रमेश जानकारी देलनि जे बैठकमे पेपर लीक, शिक्षा व्यवस्था, परिसीमन, जातिगत जनगणना, भारत-चीन संबंध सहित अनेक विषय उठाओल गेल।

जयराम रमेश कहलनि जे पेपर लीक रोकबाक लेल विभिन्न राज्यमे अलग-अलग कानून अछि, जखनिकि केंद्रक सेहो अपन कानून अछि। बैठकमे एहि बातपर विचार भेल जे केंद्र आ राज्यमे बेहतर समन्वय कोना स्थापित कएल जाए, जाहिसँ पेपर लीकक घटनापर प्रभावी रोक लगाओल जा सकए।

लोकसभामे विपक्षक नेता राहुल गांधी स्कूल सभ केर बंद होएबाक आ शिक्षाक बढ़ैत निजीकरणक मुद्दा उठेलनि। ओ कहलनि जे एहि विषयपर विशेषज्ञ सभक राय लेल जाए आ कांग्रेस पार्टी आगू कोन प्रकारक पहल कऽ सकैत अछि, ताहिपर विचार कएल जाए।

कांग्रेस जानकारी देलक जे ‘छात्रक गूंज’ कार्यक्रम देशभरिक करीब 400 स्थानपर आयोजित कएल जाएत। ई कार्यक्रम मात्र पैघ शहरसभ धरि सीमित नहि रहत, बल्कि छोट-छोट नगर आ कस्बासभमे सेहो आयोजित कएल जाएत। पार्टीक विभिन्न नेता एहि कार्यक्रमसभमे भाग लेताह, आ सभ स्थानपर राहुल गांधीक उपस्थित रहबाक योजना नहि अछि।

बैठकमे राम मंदिरक चढ़ावा मामिलापर सेहो करीब 30-40 मिनट धरि चर्चा भेल। एहि विषयपर विभिन्न वक्ता अपन-अपन विचार रखलनि। उत्तर प्रदेश कांग्रेस एहि मामिलामे पहिने विरोध कऽ चुकल अछि आ आब पार्टीक योजना अछि जे विभिन्न राज्यमे सेहो प्रदर्शन कएल जाए। कांग्रेस एहि मामिलाक जांच सुप्रीम कोर्टक कोनो जजसँ करएबाक मांग केलक, मुदा कांग्रेस कार्यसमितिक एकटा वरिष्ठ वकील सदस्य निष्पक्ष जजसँ जांच करएबाक मांग रखबाक बात कहलनि।

भारत-चीन संबंधपर सेहो बैठकमे चर्चा भेल। जातिगत जनगणनाक मुद्दापर कांग्रेस आरोप लगेलक जे प्रधानमंत्री द्वारा कएल गेल वादा पूरा नहि भऽ रहल अछि। पार्टीक कहब अछि जे वर्तमान तरीकासँ होइत जनगणनासँ अपेक्षित लाभ नहि भेटत।

परिसीमनक मुद्दापर कांग्रेस तीन महत्वपूर्ण फैसला केलक। पार्टी लोकसभाक वर्तमान 545 सीटकेँ आगामी 25 वर्ष धरि फ्रीज राखबाक मांग केलक। संगहि विभिन्न राज्यमे वर्तमान सीटसभक संख्या सेहो बरकरार राखबाक बात कहल गेल। एकर अतिरिक्त, कांग्रेस महिला आरक्षणकेँ वर्ष 2029क चुनावसँ लागू करबाक पक्षमे अछि।

कांग्रेसक कहब अछि जे परिसीमनक प्रक्रिया शुरू करबासँ पहिने एहि सभ महत्वपूर्ण मुद्दापर स्पष्टता आ व्यापक सहमति आवश्यक अछि।