तेजस्वी यादवक लखीसराय अशोक धाम मंदिर हादसाक जांच आ दोषी पर सख्त कार्रवाईक मांग
पटना । समदिया
लखीसराय स्थित प्रसिद्ध अशोक धाम मंदिरमे सावनक तेसर सोमारीक दिन भेल भगदड़-जकाँ घटनामे सात श्रद्धालुक मृत्यु पर नेता प्रतिपक्ष तेजस्वी यादव बिहार सरकारसँ उच्चस्तरीय जांच आ दोषी सभ पर सख्त कार्रवाईक मांग कयलनि अछि।
तेजस्वी यादव कहलनि जे अशोक धाम मंदिरमे जे स्थिति उत्पन्न भेल, तकरा लेल जिला प्रशासनक जिम्मेदारी बनैत छल जे श्रद्धालुक सुरक्षा आ भीड़क व्यवस्थाकेँ सुचारू राखल जाए। हुनकर कहब छल जे घटनामे जिला प्रशासनक गंभीर लापरवाही देखाइत अछि।
ओ कहलनि जे एहि दुखद घटनामे जान गमायल श्रद्धालुक परिवारक प्रति हुनकर गहींर संवेदना अछि। सरकार मृतकक परिजनकेँ उचित मुआवजा दै आ घटनाक जांच करबा कऽ जे कोनो व्यक्ति दोषी पाओल जाए, तकर विरुद्ध सख्त कार्रवाई करए।
अफवाहसँ मचल अफरातफरी
जानकारीक अनुसार, सोम दिन अशोक धाम मंदिरमे जलाभिषेक आ पूजाक लेल पैघ संख्यामे श्रद्धालु जुटल छलाह। मंदिर दिसि जाएवाला मार्ग पर बिजलीक पोल आ तार खसि गेलाक बाद भीड़क बीच करंट पसरबाक अफवाह पसरि गेल। एहिसँ श्रद्धालुक बीच अचानक अफरातफरी मचि गेल आ लोक सुरक्षित स्थान दिसि भागए लगलाह।
एहि दौरान भगदड़क स्थिति उत्पन्न भेल, जाहिमे कतेको श्रद्धालु एक-दोसरा पर खसि गेलाह। घटनामे कम-सँ-कम सात श्रद्धालुक मृत्यु भेल, जखनिकि एक दर्जनसँ बेसी लोक घायल भेलाह। सूचना भेटिते पुलिस आ जिला प्रशासनक टीम घटनास्थल पर पहुँचि राहत-बचाव कार्य शुरू कयलक आ घायल लोकनिकेँ अस्पताल पहुँचाओल गेल।
तेजस्वी यादव सरकारसँ मांग केलनि जे एहि घटनाक निष्पक्ष जांच करबाक संग भविष्यमे एहेन घटना नहि होए, ताहि लेल धार्मिक स्थल सभ पर भीड़ प्रबंधन आ सुरक्षा व्यवस्थाकेँ मजबूत बनाओल जाए।
