नितिन नवीनक नव टीममे बिहारक तीन युवा नेता, सिद्धार्थ शंभू बनलाह राष्ट्रीय सचिव

स्मृति ईरानी, वसुंधरा राजे समेत कतेको पओलनि स्थान

नई दिल्ली । समदिया

भारतीय जनता पार्टी (भाजपा)क राष्ट्रीय अध्यक्ष नितिन नबीन सोमदिन अपन नव राष्ट्रीय टीमक घोषणा केलनि। संगठनकेँ मजबूत करबाक उद्देश्यसँ बनाओल गेल एहि टीममे अनुभव आ युवा ऊर्जाक संगम देखल जा सकैछ। पार्टी द्वारा एहि संबंधमे अधिसूचना सेहो जारी कएल गेल अछि।

नव टीममे पीयूष गोयलकेँ राष्ट्रीय कोषाध्यक्ष आ राजेश मंगलकेँ राष्ट्रीय सह-कोषाध्यक्षक जिम्मेदारी देल गेल अछि। बी.एल. संतोषकेँ राष्ट्रीय महामंत्रीक दायित्व भेटल अछि। वरिष्ठ भाजपा नेत्री स्मृति ईरानीकेँ राष्ट्रीय महासचिव, जखनकि वसुंधरा राजेकेँ राष्ट्रीय उपाध्यक्ष बनाओल गेल अछि।

राष्ट्रीय उपाध्यक्ष पदपर तीरथ सिंह रावत, राम माधव, बैजयंत पांडा, डी. पुरंदेश्वरी, रेखा वर्मा, वर्षाबेन नरेंद्रभाई दोशी, भारती प्रवीण पवार, मनप्रीत सिंह बादल, लालाजी सिंह आर्य, एम. नागराज, तारिक मंसूर आ मधुचंद्र कर सहित अन्य नेतासभकेँ जिम्मेदारी देल गेल अछि।

राष्ट्रीय महामंत्रीक रूपमे विनोद तावड़े, सुनील बंसल, बिप्लव कुमार देव, स्मृति ईरानी, सतीश पूनिया, गजेंद्र पटेल, हरीश द्विवेदी आ संजय भाटियाक नाम प्रमुख अछि। राष्ट्रीय मंत्री पदपर कविता पाटीदार, के. सुरेंद्रन, भोला सिंह, प्रदीप यादव, जगदीश ईश्वरभाई पटेल, संदीप पाठक, फांग्नोन कोन्यक, संगीता यादव, अनिल एंटनी, एम. वेंकटेशन, मनोज टिग्गा, सिद्धार्थ शंभू, स्वदेश सिंह, मृगांका देव बर्मन, रोहन गुप्ता आ जय प्रकाश सहित नेतासभकेँ स्थान देल गेल अछि।

बिहारसँ तीन नेता राष्ट्रीय संगठनमे

नितिन नवीनक नव टीममे बिहारक तीन युवा चेहराकेँ महत्वपूर्ण जिम्मेदारी भेटल अछि। भाजपा नेता सिद्धार्थ शंभूकेँ राष्ट्रीय सचिव बनाओल गेल अछि। ओ पूर्व प्रदेश अध्यक्ष संजय जायसवालक कार्यकालमे प्रदेश मंत्री छलाह। बादमे सम्राट चौधरीक प्रदेश अध्यक्ष रहबाक समय हुनका प्रदेश उपाध्यक्षक जिम्मेदारी भेटल छल।

दोसर दिसि, राज्यसभा सांसद शिवेश रामकेँ भाजपा अनुसूचित जाति मोर्चाक राष्ट्रीय अध्यक्ष बनाओल गेल अछि। शिवेश राम पूर्व सांसद मुनीलाल रामक पुत्र छथि। मुनीलाल राम सासाराम लोकसभा क्षेत्रसँ 1996, 1998 आ 1999 मे सांसद निर्वाचित भेल छलाह।

बिहारक तेसर नेता ऋतुराज सिन्हाकेँ पार्टीक प्रकोष्ठ संकुलक सह-संयोजक बनाओल गेल अछि। संगठनमे सक्रिय रहल ऋतुराज सिन्हा पूर्व राज्यसभा सांसद आर.के. सिन्हाक पुत्र छथि। पूर्वमे जगत प्रकाश नड्डाक टीममे हुनका राष्ट्रीय सचिवक जिम्मेदारी सेहो भेटल छल।

सिद्धार्थ शंभू कहलनि—राष्ट्रीय नेतृत्वक भरोसापर सही उतरबाक प्रयास करब

राष्ट्रीय सचिवक जिम्मेदारी भेटलापर सिद्धार्थ शंभू राष्ट्रीय नेतृत्वक प्रति आभार व्यक्त केलनि। हुनकर कहब अछि जे पार्टी जे जिम्मेदारी देने अछि, ओकर निर्वहन ओ पूर्ण ईमानदारी आ निष्ठासँ करैत रहल छथि। आब राष्ट्रीय सचिवक रूपमे सेहो राष्ट्रीय अध्यक्ष नितिन नवीनक भरोसापर सही उतरबाक पूरा प्रयास करब।

सिद्धार्थ शंभू प्रधानमंत्री नरेंद्र मोदी, केंद्रीय गृह मंत्री अमित शाह आ भाजपा राष्ट्रीय अध्यक्ष नितिन नवीनक प्रति आभार व्यक्त करैत कहलनि जे पार्टीक राष्ट्रीय नेतृत्व हुनका जे जिम्मेदारी देलक अछि, ओकरा ओ पूरा निष्ठासँ निभेबाक प्रयास करताह।

नितिन नवीन सोशल मीडिया मंच ‘एक्स’ पर नव राष्ट्रीय टीमक पदाधिकारिसभकेँ बधाई दैत कहलनि जे अनुभव आ ऊर्जासँ समृद्ध ई टीम प्रधानमंत्री नरेंद्र मोदीक मार्गदर्शनमे संगठनकेँ नव गति देत आ ‘विकसित भारत’क संकल्प आ राष्ट्रसेवाक ध्येयकेँ आगाँ बढ़ाओत।