मिथिलाक चित्रकलाकें वैश्विक बाजारसँ जोड़बाक पहल, सौराठमे विशेष कार्यक्रमक आयोजन

मधुबनी । समदिया

८०म स्वतंत्रता दिवसक अवसर पर सौराठ स्थित मिथिला चित्रकला संस्थान परिसरमे जिला प्रशासनक तरफसँ ‘मधुबनी चित्रकला : परंपरासँ वैश्विक बाजार धरि’ विषय पर विशेष कार्यक्रम आयोजित कएल गेल। राज्यसभाक सांसद संजय झा आ जिलाक प्रभारी मंत्री लेशी सिंह कार्यक्रमक उद्घाटन कएलनि।

कार्यक्रमक अवसर पर मिथिला चित्रकलाकेँ व्यापक बाजारसँ जोड़बाक उद्देश्यसँ राज्य सरकार आ जिला प्रशासनक सहयोगसँ मिथिला चित्रकला संस्थान द्वारा विकसित ई-कॉमर्स प्लेटफॉर्म ‘madhubaniarts.bihar.gov.in’ केर शुभारंभ कएल गेल। संजय झा कहलनि जे एहि पहलसँ मिथिलाक स्थानीय कलाकार अपन उत्कृष्ट कलाकृतिसँ देश-विदेशक कलाप्रेमी आ ग्राहक धरि सहज रूपसँ पहुँचि सकताह।

कार्यक्रममे रामायण विषय पर दुनिया भरिमे चर्चित सबसँ लम्बा मधुबनी पेंटिंग तैयार कऽ विश्व रिकॉर्ड बनौनिहार मिथिला चित्रकला संस्थानक विद्यार्थी सभकेँ सम्मानित कएल गेल। एहि अवसर पर हुनकर कलाकृतिक प्रदर्शनी सेहो देखल गेल।

संस्कृति मंत्रालय, भारत सरकारक आह्वान पर जिला प्रशासन द्वारा मिथिला चित्रकला संस्थान परिसरमे कलाकार आ विद्यार्थी सभक सहभागितासँ ‘हर घर तिरंगा यात्रा’ सेहो निकालल गेल, जाहिमे संजय झा शामिल भेलाह।

कार्यक्रममे मधुबनी चित्रकलाक प्रतिष्ठित कलाकार पद्मश्री बउआ देवी, पद्मश्री दुलारी देवी, पद्मश्री शिवन पासवान, पद्मश्री शांति देवी आ डॉ. रानी झासँ संजय झा संवाद कएलनि। एहि दौरान प्राचीन मिथिला चित्रकलाक संरक्षण, संवर्धन आ एकरा वैश्विक बाजार धरि पहुँचयबाक विभिन्न पहल पर सार्थक चर्चा भेल।

संजय झा कहलनि जे मिथिला चित्रकला केवल कला नहि, बल्कि मिथिलाक समृद्ध सांस्कृतिक विरासत आ पहिचानक महत्वपूर्ण हिस्सा अछि। डिजिटल बाजारक माध्यमसँ स्थानीय कलाकारकेँ नव अवसर भेटतनि आ हुनकर कला देश-विदेशमे बेसी व्यापक रूपसँ पहुँचि सकत।

कार्यक्रममे मधुबनीक जिलाधिकारी आनंद शर्मा, वरीय पुलिस अधीक्षक योगेंद्र कुमार, मिथिला चित्रकला संस्थानक निदेशक चंद्रशेखर सिंह सहित अनेक गणमान्य व्यक्ति आ पैघ संख्यामे कलाप्रेमी उपस्थित छलाह।