नमो भारत ट्रेन चलत बिहारमे, चारि प्रमुख कॉरिडोर पर सेवा शुरू करबाक तैयारी

पटना । समदिया

दिल्ली-एनसीआरक तर्ज पर आब बिहारमे सेहो नमो भारत (RRTS) ट्रेन चलाबयक तैयारी शुरू भऽ गेल अछि। बिहार सरकार राज्यक चारि प्रमुख कॉरिडोर पर नमो भारत सेवा विकसित करबाक लेल राष्ट्रीय राजधानी क्षेत्र परिवहन निगम (NCRTC) केँ प्रस्ताव पठौने अछि। प्रस्तावित कॉरिडोरक माध्यमसँ पटनाकेँ गया, बेगूसराय, मुजफ्फरपुर आ आरासँ जोड़बाक योजना अछि।

चारि प्रमुख कॉरिडोरक प्रस्ताव

पटना-गया कॉरिडोर : करीब 108 किलोमीटर नमहर एहि कॉरिडोर पर नमो भारत सेवा शुरू भेलासँ पटना आ गयाक बीच तेज आ सुविधाजनक यातायात सुविधा विकसित होयत।

पटना एयरपोर्ट-बेगूसराय कॉरिडोर : करीब 130 किलोमीटर नमहर एहि मार्गक माध्यमसँ राजधानी पटनाकेँ बेगूसरायसँ तेज परिवहन नेटवर्कसँ जोड़बाक योजना अछि।

पटना-मुजफ्फरपुर कॉरिडोर : करीब 67 किलोमीटर नमहर एहि कॉरिडोर पर RRTS सेवा विकसित करबाक प्रस्ताव अछि। एहिसँ पटना आ मुजफ्फरपुरक बीच आवागमनक समय कम होयबाक उम्मीद अछि।

पटना एयरपोर्ट-आरा कॉरिडोर : करीब 46 किलोमीटर नमहर एहि मार्गसँ पटना आ भोजपुर क्षेत्रक बीच तेज आ बेहतर परिवहन संपर्क विकसित करबाक लक्ष्य अछि।

NCRTC करत तकनीकी आ आर्थिक अध्ययन

बिहार सरकारक प्रस्ताव भेटलाक बाद NCRTC चारू कॉरिडोरक तकनीकी आ आर्थिक व्यवहार्यताक अध्ययन करत। एहि लेल ‘अल्टरनेट एनालिसिस रिपोर्ट’ (AAR) तैयार करबाक प्रक्रिया शुरू कएल जायत।

रिपोर्टमे प्रस्तावित परियोजनाक तकनीकी संभावना, आर्थिक व्यवहार्यता आ यातायातसँ संबंधित विभिन्न पहलूक मूल्यांकन कएल जायत। रिपोर्टक आधार पर चारू कॉरिडोर पर नमो भारत सेवा शुरू करबाक अगिला कार्ययोजना तय होयत।

जँ परियोजना व्यवहार्य साबित होइत अछि, तँ बिहारमे नमो भारतक विस्तार राज्यक प्रमुख शहर सभक बीच तेज, आधुनिक आ सुविधाजनक क्षेत्रीय परिवहन व्यवस्था विकसित करबाक दिशामे महत्वपूर्ण डेग साबित भऽ सकैत अछि।