मधुबनीमे जेके लक्ष्मी सीमेंट प्लांटक विरोध, ग्रामीण आ पुलिसमे झड़प

मधुबनी । समदिया

मधुबनी जिलाक पंडौल थाना क्षेत्रक लोहट औद्योगिक क्षेत्रमे निर्माणाधीन जेके लक्ष्मी सीमेंट प्लांटक निर्माण काज रोकबाक प्रयासक दौरान ग्रामीण आ पुलिसक बीच झड़प भऽ गेल। घटनाक बाद पुलिस लाउडस्पीकरक माध्यमसँ भीड़ जुटेबाक, सरकारी काजमे बाधा पहुँचयबाक आ पुलिसक संग अभद्र व्यवहार करबाक आरोपमे 23 नामजद सहित 35-40 अज्ञात लोकक विरुद्ध प्राथमिकी दर्ज कयने अछि।

बिहारमे औद्योगिक निवेश बढ़ेबाक आ पलायन रोकबाक उद्देश्यसँ सरकार नव-नव उद्योगकेँ निवेश लेल आमंत्रित कऽ रहल अछि। मुदा, उद्योगक लेल भूमि अधिग्रहण आ निर्माण काजकेँ लऽ कऽ किछु क्षेत्रमे स्थानीय ग्रामीणक विरोध सेहो तेज भऽ रहल अछि। मुजफ्फरपुरक बाद आब मधुबनीमे जेके लक्ष्मी सीमेंट प्लांटकेँ लऽ कऽ विवाद सामने आयल अछि।

लाउडस्पीकरसँ भीड़ जुटेबाक आरोप

पुलिसक अनुसार, गश्तीक दौरान सूचना भेटल जे कमलाबाड़ी धांगड़ टोलामे एकटा टेम्पूमे लाउडस्पीकर लगा कऽ लोककेँ निर्माण स्थलपर जुटाओल जा रहल अछि। सूचना पर पुलिस घटनास्थलपर पहुँचि टेम्पू चालक नवीन पालसँ लाउडस्पीकर चलयबाक अनुमति संबंधी कागजात मांगलक। मुदा, चालक वैध अनुमति-पत्र प्रस्तुत नहि कऽ सकल।

टेम्पू जब्त करबाक क्रममे विवाद

पुलिस जखनि टेम्पू जब्त करबाक प्रयास कयलक, तखनि उदय मंडल, विनोद मंडल आ किशोरी मंडल सहित कतेको ग्रामीण घटनास्थलपर पहुँचि गेलाह। पुलिसक आरोप अछि जे ग्रामीण सभ पुलिसक संग अभद्र व्यवहार कयलनि आ एहि दौरान टेम्पूकेँ ओतयसँ भगा देल गेल।

पुलिस घटनाक्रमक वीडियो रिकॉर्ड कऽ पेन ड्राइवमे सुरक्षित रखने अछि आ ओकरा प्राथमिकी संग संलग्न कयल गेल अछि। मामिला पंडौल थानाक अपर थानाध्यक्ष चंद्रदीप ठाकुरक बयानपर बीएनएसक संबंधित धारासभ आ बिहार लाउडस्पीकर अधिनियमक प्रावधानक तहत दर्ज कयल गेल अछि।

जांचमे जुटल पुलिस

पंडौल थानाध्यक्ष शिल्पी कुमारीक अनुसार, बिना अनुमति लाउडस्पीकरक उपयोग, सरकारी काजमे बाधा आ अन्य आरोपक संबंधमे प्राथमिकी दर्ज कऽ आगू कानूनी कार्रवाई कयल जा रहल अछि।

मुजफ्फरपुरक मोतीपुरमे सेहो भेल छल विरोध

एहिसँ पहिने मुजफ्फरपुरक मोतीपुर औद्योगिक क्षेत्रमे बियाडा द्वारा आवंटित जमीनपर प्रस्तावित सीमेंट फैक्ट्रीक विरोध ग्रामीण सभ कयने छलाह। बर्जी गामक प्रभावित रैयत सभ भूमि अधिग्रहणक विरोधमे जिलाधिकारीकेँ ज्ञापन दऽ अपन आपत्ति दर्ज करौने छलाह।

औद्योगिक निवेश आ रोजगारक अवसरक संग-संग स्थानीय लोकक भूमि, मुआवजा आ अन्य सरोकारक समाधान सेहो महत्वपूर्ण मानल जा रहल अछि। मधुबनीक लोहटमे जेके लक्ष्मी सीमेंट प्लांटकेँ लऽ कऽ उत्पन्न विवाद आब प्रशासन आ ग्रामीणक बीच संवादसँ कोना सुलझैत अछि, एहि पर सभक नजरि अछि।