दस हजार नौकरीक प्रतिज्ञा पर गरमायल राजनीति, भाजपा-राजदक अलग-अलग प्रतिक्रिया

पटना । समदिया

बांकीपुरक विधायक आ जन सुराज नेता प्रशांत किशोर द्वारा बिहारक 10 हजार युवाकेँ नौकरी दियेबाक घोषणा पर राज्यक राजनीति गरमा गेल अछि। प्रशांत किशोर कहलनि जे हुनकर देशक पैघ-पैघ उद्योगपतिसँ संपर्क अछि आ ओ बिहारक 10 हजार युवाकेँ बिहारसँ बाहर विभिन्न फैक्ट्रीमे नौकरी लगेबाक प्रयास करताह। एहि लेल हुनका द्वारा युवासँ बायोडाटा सेहो मंगाओल गेल अछि।

प्रशांत किशोरक एहि घोषणापर भाजपा आ राजदक नेता अपन-अपन प्रतिक्रिया देलनि अछि।

उद्योग बिहारमे लगाउ : भाजपा

भाजपा प्रवक्ता नीरज कहलनि जे जँ प्रशांत किशोरक देशक पैघ उद्योगपतिसँ वास्तवमे संपर्क अछि तँ बिहारक युवाकेँ बाहर नौकरी लेल पठेबाक बात नहि करथि। ओ उद्योगपतिसँ बात कऽ बिहारमे उद्योग लगेबाक पहल करथि, जाहिसँ राज्यक युवाकेँ अपनहि प्रदेशमे रोजगार भेटि सकय आ पलायन कम होए।

ओ कहलनि जे बिहार सरकार राज्यक बच्चासभकेँ एतहि रोजगार आ नौकरी देबाक दिशामे काज कऽ रहल अछि। 10 हजार युवाकेँ नौकरी लेल बाहर पठेबाक बात कऽ जनताकेँ मूर्ख बनयबाक प्रयास नहि करबाक चाही।

शिक्षा मंत्रीक सेहो निशाना

राज्यक शिक्षा मंत्री सेहो प्रशांत किशोरपर हमला करैत कहलनि जे बांकीपुरक विधायक बहुत व्यस्त छथि आ क्षेत्रक जनताकेँ हुनका देखनाइ सेहो मुश्किल अछि। 10 हजार युवाकेँ नौकरी देबाक दावापर सेहो मंत्री सवाल उठौलनि।

राजद कहलक—नौकरी देलाक बाद कहितथि तँ बेसी नीक रहैत

राजद विधायक भाई वीरेंद्र प्रशांत किशोरक घोषणाक समर्थन करैत कहलनि कि, जे कियो नौकरी देबाक बात करैत छथि, तकर स्वागत होयबाक चाही। मुदा जँ 10 हजार युवाकेँ नौकरी दऽ देलाक बाद ई बात कहल जाइत तँ बेसी नीक रहैत।

प्रशांत किशोरक घोषणा

बांकीपुरमे जीत दर्ज करबाक बाद जन सुराज विधायक प्रशांत किशोर यारपुर राजपूतानामे आयोजित एकटा कार्यक्रममे कहलनि जे बांकीपुरक पढ़ल-लिखल बेरोजगार युवासभ अपन बायोडाटा हुनकर कार्यालयमे जमा कराउ। ओ कहलनि जे कम-सँ-कम 10 हजार परिवारक बच्चाक नौकरी दियेबाक प्रयास करताह।

प्रशांत किशोरक एहि घोषणाक बाद आब एहि मुद्दापर राजनीतिक बयानबाजी तेज भऽ गेल अछि।