मणिपुरसँ कांग्रेस राहुल गाँधीक नेतृत्वमे ६६ दिवसीय ‘भारत जोड़ो न्याय यात्रा’क प्रारम्भसँ पहिने अन्य विवरणक सङ्ग थीम गीत आ यात्राक कतेको वीडियो जारी कयलक।
पार्टी कहलक जे ई यात्रा पछिला १० सालमे देशक संग भेल राजनीतिक, आर्थिक आ सामाजिक अन्यायकेँ ध्यानमे राखि कयल जा रहल अछि। कांग्रेसक महासचिव जयराम रमेश कहलनि जे आब भारतक समक्ष सबसँ पैघ चुनौती एकटा अनैतिक विचारधारा अछि जे ध्रुवीकरण, आर्थिक असमानता आ राजनीतिक अधिनायकवादकेँ बढ़ावा दैत अछि। प्रधानमंत्री नरेन्द्र मोदी द्वारा देखाओल गेल स्वर्णिम सपना आ ‘अमृत काल’क उल्लेख करैत ओ कहलनि जे पछिला १० सालसँ देशमे ‘अन्याय काल’ कायम अछि। रमेश ई बात तखन कहलखिन जखन ओ मीडियाकर्मीसँ गप्प कऽ रहल छलाह। हुनका सङ्ग मणिपुरक पूर्व मुख्यमंत्री ओकराम इबोबी सिंह, प्रदेश पार्टी प्रमुख कीशम मेघचन्द्र सिंह आ कांग्रेस कार्य समितिक सदस्य गैखंगम सेहो छलाह।
राज्यसभा सदस्य रमेश कहलनि जे ई यात्रा, जे मणिपुरसँ महाराष्ट्र धरि १५ राज्यकेँ कवर करत, एकटा धर्मनिरपेक्ष देशमे वैचारिक कदम अछि, चुनावी नहिं। भारत जोड़ो न्याय यात्रा ६६ दिनमे १०० लोकसभा निर्वाचन क्षेत्र, ११० जिलाकेँ कवर करैत ६,७१३ किलोमीटरक दूरी तय करत। कांग्रेसक मानब छनि जे ई सितम्बर २०२२ मे शुरू भेल राहुल गाँधीक ‘भारत जोड़ो यात्रा’ जकाँ “परिवर्तनकारी” साबित होयत आ देशक दक्षिणी छोरक कन्याकुमारीसँ ३० जनवरी २०२३ सँ कश्मीरक उत्तरी छोरक श्रीनगर धरि चलत। कांग्रेसक नेता लोकनि भाजपाक नेतृत्ववला केन्द्र सरकारक आलोचना करैत कहलनि जे ‘भारत जोड़ो न्याय यात्रा’ निकालल गेल छल, कियैक, किएक तँ वर्तमान सरकार विपक्षकेँ संसदमे जनताक मुद्दा उठयबाक अनुमति नहि देलक। ओ जनताक १९२ निर्वाचित सांसदकेँ निष्कासित कऽ देशक सङ्ग पैघ अन्याय कयलनि। एहि यात्राक उद्देश्य न्यायक सिद्धान्तकेँ फेरसँ स्थापित करब अछि। संविधानकेँ बचाबय पड़त किएक तँ देशवासीक स्वतंत्रता, समानता आ बंधुत्व संविधानमे निहित अछि।
कांग्रेस अध्यक्ष मल्लिकार्जुन खड़गे रविदिन थौबल जिलाक खोंगजोम युद्ध स्मारकसँ यात्राकेँ झंडी देखा कऽ रवाना कय रहल छथि। मणिपुर कांग्रेसक अध्यक्ष कीशम मेघचन्द्र सिंह कहलनि जे २ जनवरीकेँ राज्यक राजधानीक हप्ता कांगजीबुंग महल परिसर मैदानसँ यात्रा शुरू करबाक अनुमति माँगल गेल छल, मुदा मणिपुर सरकार किछु शर्त लगा देलक जाहिसँ पार्टीकेँ आयोजन स्थल थौबल स्थानान्तरित करय पड़ल। ओ कहलनि जे देश भरिक मुख्यमंत्री आ सांसद सहित पार्टीक कतेको नेता हिंसाग्रस्त मणिपुरमे शांतिपूर्ण रैली लेल जमा भऽ रहल छथि। एआईसीसी महासचिव (संगठन) के.सी. वेणुगोपाल कहने छलाह जे ई यात्रा मणिपुरसँ नागालैंड, असम, अरुणाचल प्रदेश आ मेघालय धरि जायत आ ६६ दिनमे १५ राज्यमे ६,७१३ किलोमीटरक दूरी तय कयलाक बाद २० मार्चकेँ मुम्बईमे समाप्त होयत। ओ कहने छलाह जे ई यात्रा महिला, युवा, किसान आ गरीबक लेल न्यायक माँग करत, आ ई ऐतिहासिक सेहो होयत।
