पटना हाईकोर्टक नव मुख्य न्यायाधीश हेताह जस्टिस वी. कामेश्वर राव

सुप्रीम कोर्ट कॉलेजियम 6 अगस्तक बैठकमे कएल अनुशंसा, शीघ्र भेटत पटना हाईकोर्टकेँ नव नेतृत्व

पटना । समदिया

पटना हाईकोर्टकेँ शीघ्र नव मुख्य न्यायाधीश भेटबाक बाट प्रशस्त भऽ गेल अछि। सुप्रीम कोर्ट कॉलेजियम दिल्ली हाईकोर्टक न्यायाधीश वी. कामेश्वर रावकेँ पटना हाईकोर्टक मुख्य न्यायाधीश नियुक्त करबाक अनुशंसा कएने अछि। ई निर्णय 6 अगस्त 2026 केँ भेल कॉलेजियमक बैठकमे लेल गेल।

कॉलेजियम जस्टिस वी. कामेश्वर रावक अतिरिक्त तीन अन्य न्यायाधीशकेँ सेहो अलग-अलग हाईकोर्टक मुख्य न्यायाधीश बनयबाक अनुशंसा कएने अछि।

1965 मे भेल जन्म, 1991 सँ वकालतक शुरुआत

जस्टिस वी. कामेश्वर रावक जन्म 7 अगस्त 1965 केँ भेल। ओ दिल्ली विश्वविद्यालयसँ 1987 मे भूगोल विषयमे बीए ऑनर्स आ 1990 मे एलएलबीक पढ़ाइ पूरा कएलनि। मार्च 1991 मे बार काउंसिल ऑफ दिल्लीमे अधिवक्ताक रूपमे नामांकन करौलनि।

वकालतक दौरान ओ सुप्रीम कोर्ट, दिल्ली हाईकोर्ट आ केंद्रीय प्रशासनिक अधिकरणक प्रधान पीठमे विभिन्न मामिलाक पैरवी कएलनि। मद्रास हाईकोर्ट आ पोर्ट ब्लेयर स्थित कलकत्ता हाईकोर्टक सर्किट बेंचमे सेहो मामिलाक प्रतिनिधित्व कएलनि।

सेवा, श्रम, मध्यस्थता, संवैधानिक आ प्रशासनिक कानूनसँ जुड़ल मामिलामे हुनकर विशेष दक्षता रहल अछि। ओ विभिन्न सार्वजनिक उपक्रम, बैंक आ स्वायत्त संस्थाक सेहो प्रतिनिधित्व कएलनि।

2010 मे बनलाह सीनियर एडवोकेट

जनवरी 2010 मे दिल्ली हाईकोर्ट द्वारा जस्टिस वी. कामेश्वर रावकेँ सीनियर एडवोकेटक रूपमे नामित कएल गेल। 17 अप्रैल 2013 केँ ओ दिल्ली हाईकोर्टक अतिरिक्त न्यायाधीश बनलाह आ 18 मार्च 2015 केँ स्थायी न्यायाधीशक रूपमे पदभार ग्रहण कएलनि।

एक जून 2024 केँ ओ कर्नाटक हाईकोर्टमे पदभार संभारलनि। 30 मई 2025 केँ ओ कर्नाटक हाईकोर्टक कार्यकारी मुख्य न्यायाधीशक दायित्व सेहो निभौलनि। बादमे 21 जुलाई 2025 केँ दिल्ली हाईकोर्ट वापस अएलाह।

आब सुप्रीम कोर्ट कॉलेजियमक अनुशंसाक बाद जस्टिस वी. कामेश्वर रावक पटना हाईकोर्टक मुख्य न्यायाधीशक रूपमे नव जिम्मेदारी संभारबाक बाट खुजि गेल अछि। नियुक्तिक औपचारिक प्रक्रिया पूरा भेलाक बाद पटना हाईकोर्टकेँ हुनकर रूपमे नव नेतृत्व भेटत।