स्टील हब बनेबाक दिशामे बिहारक पैघ छलांग, 51,600 करोड़क निवेश
पटना । समदिया
बिहारमे औद्योगिक विकासकेँ नव गति देबाक उद्देश्यसँ राज्य सरकार आ देशक विभिन्न औद्योगिक समूहसभक बीच करीब ₹51,600 करोड़क निवेश लेल समझौता ज्ञापन (एमओयू) पर हस्ताक्षर भेल अछि। मुख्यमंत्री सम्राट चौधरीक उपस्थितिमे सम्पन्न एहि कार्यक्रमकेँ राज्यक औद्योगिक विकासक दिशामे महत्वपूर्ण कदम मानल जा रहल अछि।
सरकारक अनुसार, एहि निवेश प्रस्तावसभसँ राज्यमे नव उद्योगक स्थापना होयत आ हजारों लोकक लेल रोजगारक अवसर सृजित हएत। मुख्यमंत्री कहलनि जे सरकारक प्राथमिकता निवेश प्रस्तावसभकेँ शीघ्र धरातल पर उतारब अछि, जाहिसँ बिहारमे औद्योगिक गतिविधिमे तीव्र वृद्धि भऽ सकए।
मुख्यमंत्री कहलनि जे बिहारकेँ देशक प्रमुख ‘स्टील हब’ बनेबाक लक्ष्यसँ स्टील आ मेटल क्षेत्रमे पैघ निवेशकेँ प्रोत्साहन देल जाएत। एकर अतिरिक्त टेक्सटाइल, न्यूक्लियर एनर्जी, फूड प्रोसेसिंग आ फार्मा क्षेत्रमे सेहो निवेश बढ़ेबाक प्रयास कएल जाएत।
एमओयू पर हस्ताक्षर करऽ वला प्रमुख कम्पनीसभमे श्याम स्टील मैन्युफैक्चरिंग लिमिटेड, शाकंभरी इस्पात एंड पावर लिमिटेड, नक्षित आयरन एंड स्टील प्राइवेट लिमिटेड, श्री लंगटा बाबा मेटल्स एंड पावर लिमिटेड, अंकुर स्टील प्राइवेट लिमिटेड आ श्री समृद्धि स्टील प्राइवेट लिमिटेड शामिल छथि। एकर अतिरिक्त ग्लोबल रिन्यूएबल एडवांस्ड क्लीन एनर्जी प्राइवेट लिमिटेड न्यूक्लियर एनर्जी क्षेत्रमे निवेश करबाक प्रतिबद्धता व्यक्त केलक, जखनि कि आन कम्पनीसभ टेक्सटाइल आ संबंधित उद्योगमे निवेश करत।
मुख्यमंत्री कहलनि जे टेक्सटाइल उद्योग श्रम-प्रधान क्षेत्र अछि, जाहिसँ राज्यमे व्यापक स्तर पर रोजगार सृजन होएत। फूड प्रोसेसिंग उद्योगक विस्तारसँ किसानसभकेँ बेहतर बाजार भेटत आ ग्रामीण अर्थव्यवस्थाकेँ मजबूती भेटत। स्वच्छ ऊर्जामे निवेश भविष्यक ऊर्जा आवश्यकताकेँ पूरा करबामे महत्वपूर्ण भूमिका निभाओत।
एहि अवसर पर मुख्यमंत्री ‘बिहार बिजनेस कनेक्ट-2026’ केर तैयारीक सेहो समीक्षा कएलनि। हुनकर कहब छल जे एहि आयोजनक माध्यमसँ देश-विदेशक निवेशकसभकेँ बिहारमे उपलब्ध औद्योगिक अवसरसभसँ जोड़ल जाएत।
सम्राट चौधरी “बिल्ड एंड बिलीव इन बिहार” केँ राज्यक औद्योगिक विकासक मूल मंत्र बतबैत कहलनि जे सरकार निवेशकसभक विश्वास मजबूत करबाक आ उद्योग स्थापना प्रक्रियाकेँ सरल बनेबाक लेल मिशन मोडमे काज कऽ रहल अछि।
