ई-20 पेट्रोल नीतिक विरोधमे आइ 4 अगस्तकेँ प्रधानमंत्री आवास धरि केजरीवालक मार्च
नई दिल्ली । समदिया
आम आदमी पार्टीक राष्ट्रीय संयोजक अरविन्द केजरीवाल घोषणा कएलनि अछि जे ई-20 पेट्रोल नीतिक विरोधमे मंगल, 4 अगस्त पार्टीक लगभग 100 कार्यकर्ता आ समर्थकक संग प्रधानमंत्री आवास धरि शांतिपूर्ण मार्च कएल जाएत। हुनकर कहब अछि जे एहि अवसर पर प्रधानमंत्रीक नामसँ तैयार ऑनलाइन याचिका आ नागरिकसभक पत्र सौंपबाक प्रयास कएल जाएत।
केजरीवाल आशा व्यक्त कएलनि जे प्रधानमंत्री हुनकासँ भेंट करताह आ ई-20 नीति संबंधी जनचिन्तासभ पर विचार करताह। हुनकर दावा अछि जे ई-20 पेट्रोलक विरोधमे चलाओल ऑनलाइन अभियानकेँ किछुए दिनमे 2,33,238 लोकक समर्थन भेटल अछि आ एतेक नागरिक प्रधानमंत्रीक नाम याचिकापर हस्ताक्षर कएने छथि।
हुनका अनुसार आइ मंगलकेँ दुपहरिया 12 बजे आम आदमी पार्टी मुख्यालयसँ प्रधानमंत्री आवास दिसि मार्च प्रारम्भ होएत। ओ आरोप लगौलनि जे लगभग एक मास पूर्व प्रधानमंत्रीसँ भेंटक समय मांगल गेल छल, मुदा एखनि धरि कोनो उत्तर नहि भेटल। एहि कारण आब स्वयं प्रधानमंत्री आवास जा कऽ याचिका आ जनताक पत्र सौंपबाक प्रयास कएल जाएत।
केजरीवाल केन्द्र सरकारक ई-20 नीति पर अनेक प्रश्न उठबैत कहलनि जे पर्याप्त वैज्ञानिक आ तकनीकी स्पष्टीकरणक बिना देशभरिमे एहि नीतिक विस्तार कएल जा रहल अछि। हुनकर दावा अछि जे ई-20 पेट्रोलक उपयोगसँ किछु वाहनक माइलेज प्रभावित भऽ रहल अछि आ वाहन मालिकसभकेँ तकनीकी समस्याक सामना करए पड़ि रहल अछि।
ओ कहलनि जे जँ सरकारक पक्षमे ठोस तर्क अछि तँ ओ सार्वजनिक कएल जाए। संगहि आरोप लगौलनि जे ई-20 नीतिक विरोध करनिहार सोशल मीडिया इन्फ्लुएंसर, कंटेन्ट क्रिएटर आ सामान्य नागरिकसभ पर दबाव बनाओल जा रहल अछि तथा किछु मामिलामे एफआईआर दर्ज होएबाक बात सेहो सामने आएल अछि।
केजरीवालक दावा अछि जे हालहिमे आयोजित ई-20 विरोधी टाउनहॉल कार्यक्रममे व्यापक जनसमर्थन देखल गेल। हुनकर अनुसार कार्यक्रममे प्रत्यक्ष रूपसँ बहुत लोक सहभागी भेलाह, जखनि कि लाखों लोक एकरा ऑनलाइन सेहो देखलनि।
ओ केन्द्र सरकार पर आरोप लगबैत कहलनि जे ई-20 नीतिक पाछाँ कोनो “गुप्त उद्देश्य” भऽ सकैत अछि। हुनका अनुसार सरकारकेँ स्पष्ट करबाक चाही जे इथेनॉल नीतिक क्रियान्वयन कोनो बाहरी दबावमे तँ नहि भऽ रहल अछि। आम आदमी पार्टी स्पष्ट कएने अछि जे आइ मंगलक मार्च पूर्णतः शांतिपूर्ण रहत आ एकर उद्देश्य केवल जनताक चिन्ता आ मांग प्रधानमंत्री धरि पहुँचेनाइ अछि।