दक्षिणी लेबनान पर फेर इजरायली हमला, युद्धविरामक बीच क्षेत्रमे तनाव बढ़ल
नई दिल्ली । समदिया
इजरायल आ लेबनानक बीच युद्धविरामक बावजूद दक्षिणी लेबनानमे फेरसँ सैन्य तनाव बढ़ि गेल अछि। समाचारक अनुसार, इजरायली सेनाक ताजा हवाई आ तोपखाना हमलामे टायर, मरजायून, बिंत जबील सहित अनेक क्षेत्र आ आसपासक गामसभ निशाना बनाओल गेल।
रिपोर्टक अनुसार, इजरायली ड्रोन नबातियेहक अली अल-ताहर पहाड़ी क्षेत्र पर बमबारी कएलक तथा विस्फोटक आ आगि लगाबऽ बला हथियारक प्रयोग कएल गेल। टायरक निकट चामा गाममे तोपसँ गोलाबारी कएल गेल, जखनीकि तैयबे आ यारून गामक जैतूनक बगानमे आगि लगाओल जाएबाक खबर अछि।
सूचनाक अनुसार, रविदिन हिज्बुल्लाह द्वारा इजरायल पर कएल गेल हमलाक बाद दुनू पक्षक बीच फेर संघर्ष तेज भऽ गेल। हिज्बुल्लाहक कहब अछि जे ई कार्रवाई लेबनान पर लगातार भऽ रहल इजरायली हमलाक जवाबमे कएल गेल।
रिपोर्टमे कहल गेल अछि जे 16 अप्रैलकेँ इजरायल आ लेबनानक बीच युद्धविराम समझौता भेल छल, मुदा एकर बादो अनेक बेर एहि समझौताक उल्लंघन होइत रहल अछि। बादमे 26 जूनकेँ अमेरिकाक मध्यस्थतामे वॉशिंगटनमे एकटा रूपरेखा समझौतापर हस्ताक्षर भेल, जाहिमे दक्षिणी लेबनानसँ इजरायली सेनाक चरणबद्ध वापसी आ ओतए लेबनानी सेनाक तैनातीक व्यवस्था प्रस्तावित कएल गेल छल।
एहि बीच, हिज्बुल्लाहक महासचिव शेख नईम कासिम एहि समझौताकेँ इजरायलक समक्ष आत्मसमर्पणक समान बतौने छथि। युद्धविराम लागू रहबाक बावजूद दक्षिणी लेबनानमे बीच-बीचमे सैन्य कार्रवाई जारी रहलासँ क्षेत्रीय सुरक्षाकेँ लऽ कऽ चिन्ता बढ़ि गेल अछि।
