वैशालीक कराटे खिलाड़ीसभक राज्यस्तरीय चैंपियनशिपमे दमदार प्रदर्शन, 5 स्वर्ण आ 2 रजत सहित कुल 7 पदक पर कब्जा
पटनामे आयोजित ओपन बिहार कप कराटा चैंपियनशिप-2026 मे वॉरियर मार्शल आर्ट्स एकेडमी, हाजीपुरक खिलाड़ीसभ बढ़ौलनि जिलाक गौरव
हाजीपुर । समदिया
वैशाली जिलाक उभरैत कराटे खिलाड़ीसभ ओपन बिहार कप कराटे चैंपियनशिप-2026 मे शानदार प्रदर्शन करैत कुल सातटा पदक जीतिकऽ जिलाक नाम रौशन कएलनि। प्रतियोगितामे वॉरियर मार्शल आर्ट्स एकेडमी, बागमली (हाजीपुर)क सात सदस्यीय टीम भाग लेलक, जाहिमे पाँच गोटे स्वर्ण आ दू गोटे रजत पदक जीतिकऽ राज्य स्तर पर अपन प्रतिभाक लोहा मनबौलनि।
स्टेट कराटे एसोसिएशन ऑफ बिहारक तत्वावधानमे पटनामे आयोजित एहि प्रतियोगितामे राज्यक विभिन्न जिलासँ सैकड़ों खिलाड़ी भाग लेने छलाह। टीम मैनेजर आ सहायक प्रशिक्षक अनुराग कुमारक अनुसार, सब-जूनियर बालिका वर्गमे नमामी कश्यप, मानसी मांझी, कशिश रंजन, दित्या प्रियदर्शिनी आ दिव्यांका चौरसिया अपन-अपन वर्गमे उत्कृष्ट प्रदर्शन करैत स्वर्ण पदक हासिल कएलनि।
ओतहि सीनियर महिला वर्गमे अपर्णा शुक्ला रजत पदक जीतलीह, जखनिकि सब-जूनियर बालक वर्गमे सत्यार्थ उत्कृष्ट खेलक प्रदर्शन करैत रजत पदक अपन नाम कएलनि।
ई सभ सफलता वैशाली कराटे संघक अध्यक्ष आ मुख्य प्रशिक्षक सेंसेई रुपाली कुमारीक सतत प्रशिक्षण आ मार्गदर्शनक परिणाम मानल जा रहल अछि। हुनकर नेतृत्वमे खिलाड़ीसभ अनुशासन, मेहनत आ नियमित अभ्यासक बल पर ई उपलब्धि हासिल कएलनि।
खिलाड़ीसभक शानदार प्रदर्शनसँ वैशाली जिलामे हर्षक वातावरण अछि। खेलप्रेमी, अभिभावक आ स्थानीय नागरिक सभ विजेता खिलाड़ीसभकेँ शुभकामना दैत हुनकर उज्ज्वल भविष्यक कामना कएलनि। वैशाली कराटे संघक कोषाध्यक्ष सेंसेई सुजीत कुमार कहलनि जे ई सफलता मेहनत, समर्पण आ अनुशासनक प्रतिफल अछि आ भविष्यमे ई खिलाड़ी राष्ट्रीय एवं अंतरराष्ट्रीय स्तर पर सेहो बिहार आ वैशालीक नाम रोशन करताह।
प्रतियोगिताक समापन समारोहमे स्टेट कराटे एसोसिएशन ऑफ बिहारक सचिव रेन्शी पंकज कांबली, कोषाध्यक्ष पल्लवी श्रीवास्तव आ इंडियन कराटे कोच सेंसेई सावन विजेता खिलाड़ीसभकेँ पदक, प्रशस्ति-पत्र आ “अवॉर्ड ऑफ एक्सीलेंस” प्रदान कऽ सम्मानित कएलनि। अतिथिसभ खिलाड़ीसभक प्रदर्शनक मुक्तकंठसँ सराहना करैत उज्ज्वल भविष्यक शुभकामना देलनि।
वैशालीक एहि उल्लेखनीय सफलतासँ जिलाक अन्य युवा खिलाड़ीसभ सेहो खेलक क्षेत्रमे आगाँ बढ़बाक लेल प्रेरित भऽ रहल छथि।
