नेपालमे हिंसाक बाद बिहार-नेपाल सीमापर सुरक्षा सक्कत, आबै-जाइबला सभक सघन जांच
मधुबनी । समदिया
नेपालक किछु जिलामे सांप्रदायिक हिंसाक घटनाक बाद बिहारसँ सटल भारत-नेपाल अंतरराष्ट्रीय सीमापर सुरक्षा व्यवस्था अत्यन्त सक्कत कएल गेल अछि। सीमा सुरक्षा बल (एसएसबी) आ बिहार पुलिस पूर्ण सतर्कताक संग सीमापर आबै-जाइबला प्रत्येक व्यक्ति आ वाहनक गहन जांच कऽ रहल अछि। वैध पहचान-पत्र आ आवश्यक दस्तावेजक जांचक बादे भारतीय सीमामे प्रवेशक अनुमति देल जा रहल अछि।
सभसँ बेसी चौकसी पूर्वी चम्पारणक रक्सौल आ अररियाक फुलकाहा सीमा चौकीपर बरतल जा रहल अछि। रक्सौलक मैत्री पुलपर एसएसबीक जवान लगातार वाहन आ यात्रीसभक जांचमे जुटल छथि। फुलकाहामे सेहो अतिरिक्त सुरक्षा बल तैनात कएल गेल अछि आ सीमा पारक प्रत्येक गतिविधिपर पैघ नजरि राखल जा रहल अछि।
प्राप्त जानकारीक अनुसार, नेपालक सुनसरी जिला अन्तर्गत देवानगंज ग्रामपालिकाक कप्तानगंज क्षेत्रमे दू समुदायक बीच भेल विवाद हिंसक रूप धारण कऽ लेने छल। गोलीबारीमे दू युवकक मृत्यु भेलाक बाद ओतय तनाव बढ़ि गेल, जकर बाद भारतीय सुरक्षा एजेंसीसभ सीमापर निगरानी आर कड़गड़ कऽ देने अछि।
संयुक्त गश्त आ फ्लैग मार्च
फुलकाहा एसएसबी बीओपी प्रभारी सहायक सेनानायक राणा कुमारक नेतृत्वमे एसएसबी, बिहार विशेष सशस्त्र पुलिस (बीएसएपी) आ बिहार पुलिस संयुक्त रूपसँ सर्च अभियान चला रहल अछि। मानिकपुर सीमापर सेहो संयुक्त फ्लैग मार्च निकालि सीमावर्ती ग्रामीणसभसँ शांति, सद्भाव आ सतर्कता बनेने राखबाक अपील कएल गेल।
व्यापारो भेल प्रभावित
नेपालमे उत्पन्न तनावक असरि सीमा पार व्यापार पर सेहो देखाइ पड़ि रहल अछि। जांचक कड़ाईक कारण दैनिक आवागमन प्रभावित भेल अछि आ व्यापारी तथा यात्रीसभकेँ असुविधाक सामना करए पड़ि रहल अछि। प्रशासनक कहब अछि जे नागरिकक सुरक्षा सर्वोच्च प्राथमिकता अछि, तेँ स्थिति सामान्य होबए धरि सीमापर सक्कत निगरानी जारी रहत।
